Operacioni antiterrorist “Burimi i Paqes” të cilin ushtria turke e filloi në veri të Sirisë ka prishur shumë lojëra, tha ministri i Jashtëm i Turqisë, Mevlüt Çavuşoğlu, transmeton Anadolu Agency.
Duke folur në një transmetim në televizionin Kanal 7, Çavuşoğlu tha se me operacionin “Burimi i Paqes” është mbrojtur integriteti territorial i Sirisë.
Ai theksoi se edhe gjatë operacioneve të mëparshme ndërkufitare të Turqisë, “Mburoja e Eufratit” dhe “Dega e Ullirit”, është parandaluar formimi i një korridori terrorist të planifikuar nga kufiri i Irakut deri në Mesdhe.
“Ne komunitetit ndërkombëtar ia kemi shpjeguar operacionin ‘Burimi i Paqes’ dhjetë herë më shumë sesa operacionin ‘Dega e Ullirit’. Kemi njoftuar edhe vende të cilat më parë nuk i kishin njoftuar. Mirë, pra, pse reagimet atëherë ishin të pakta, kurse tani të shumta? Sepse ne prishëm një lojë të madhe. Kjo është e vërteta e kësaj zhurme. Këtu do të krijonin një shtet të PKK-së”, tha shefi i diplomacisë turke.
Ai riafirmoi se shtetet që thonë se i kuptojnë shqetësimet e Turqisë duhet t’i shohin si legjitime edhe hapat e Turqisë për t’i mënjanuar këto shqetësime të sigurisë.
“Me këtë operacion u qëlluan dy zogj me një gur. Ky ishte një oeracion shumë strategjik, i rëndësishëm dhe në kohë të duhur jo vetëm për ne, por edhe për sigurinë dhe stabilitetin e Sirisë dhe gjithë rajonit”, shtoi Çavuşoğlu.
Më 9 tetor, Turqia nisi operacionin “Burimi i Paqes” në lindje të lumit Eufrat në veri të Sirisë për të siguruar kufijtë e saj duke eleminuar elementet terroriste dhe për të garantuar kthimin e sigurt të refugjatëve sirianë dhe integritetin territorial të Sirisë.
Ankaraja synon ta pastrojë rajonin në lindje të lumit Eufrat nga terroristët e PKK-së dhe dega e saj siriane, PYD/YPG.
Ndërkaq, të enjten, Turqia dhe SHBA arritën një marrëveshje për të pezulluar operacionin antiterrorist në veri të Sirisë.
Turqia ra dakord të ndaloje operacionin e saj “Burimi i Paqes” për 120 orë në mënyrë që të lejojë tërheqjen e terroristëve të YPG/PKK-së nga zona e planifikuar e sigurt.
Në bisedimet e së enjtes, presidenti turk Recep Tayyip Erdoğan dhe nënpresidenti amerikan Mike Pence gjithashtu ranë dakord që Turqia të ketë një zonë prej rreth 30 kilometrash në kufirin sirian.
Në fushatën e saj terroriste më shumë se 30-vjeçare kundër Turqisë, PKK, e listuar si organizatë terroriste nga Turqia, SHBA dhe Bashkimi Evropian, është përgjegjëse për vdekjen e rreth 40.000 njerëzve, përfshirë shumë gra dhe fëmijë
