Një Gjykatë në Stamboll ka vendosur që të caktojë një administrator shtetëror për gazetën më të madhe opozitare atje “Zaman”. Gazeta ka një tirazh ditor më shumë se 1 milion kopje.
Caktimi i një administratori shtetëror, praktikisht do të thotë mbyllje të saj, siç ka ndodhur edhe me shumë media të tjera. Vendimi ka shkaktuar protesta të stafit të gazetës, e cila ka mbi një mijë punonjës.
Vendimi i Gjykatës ka ardhur me kërkesë të Prokurorisë së Stambollit, njofton agjencia shtetërore e lajmeve Anadolu. Një turmë njerëzish u mblodh përpara godinës në përkrahje të medias në fjalë. “Ne jemi duke përjetuar një ditë të turpshme për lirinë e medias në Turqi. Institucionet e mediave tona janë duke u konfiskuar”, tha editori i gazetës Sevgi Akarçeşme.