Kryeministri Edi Rama vizitoi artistët që qëndrojnë në ish-vilën e diktatorit Hoxha.
Rama bisedoi me drejtoren ekzekutive të programit të Fondacionit Art Explora, Bisej Kapo, e cila ndodhej së bashku me artistët në residence, gjatë kohës së sulmit nga protestuesit.
“Erdha për t’u takuar me artistët dhe për t’ju shprehur atyre të gjithë ndjenjën time të keqardhjes, për t’ju kërkuar falje për atë çka ndodhi mbrëmë kur u gjendën nën një sulm bombash artizanale, që larg qoftë, mund të kishin sjellë edhe tragjedi këtu.”
Rama theksoi se këto akte dëmtojnë imazhin e Shqipërisë.
“Kjo që ka ndodhur është një turp shumë i madh, është një dëm shumë i madh, është një plagë e hapur në atë që është fytyra e Shqipërisë së re dhe të cilën e përfaqëson dhe kjo rezidencë, të cilën e mishërojnë dhe këta djem dhe këto vajza të talentuara, që vijnë nga të katër anët e botës këtu.”
Nga ana tjetër Rama u bëri thirrje simptizantëve të opozitës të distancohen nga këto akte dhune.
“Nuk është padija, është marrëzia, është ligësia, është verbëria, është një kompleks gjërash dhe mbi të gjitha është urrejtja. Një turp i pashoq që nxin Shqipërinë, që na nxin të gjithëve pavarësisht se ata që e bënë janë katran i Shqipërisë dhe janë fatmirësisht një grusht njerëzish.”
Në reagim e tij, fajtor kryeministri bën edhe sitemin e drejtësisë. Sepse sipas tij, gjykatësit, që paguhen si frëngu pulën nga taksat e shqiptarëve, i nxjerrin prapë në rrugë zjarrvënësit sapo i arreston policia.
