Papa Leoni i 14-të ka shprehur shqetësimin e tij të thellë, për atë që po ndodh në Lindjen e Mesme dhe në Iran.
“Po ndjek me shqetësim të thellë atë që po ndodh në Lindjen e Mesme dhe në Iran në këtë kohë dramatike. Stabiliteti dhe paqja nuk mund të ndërtohen përmes kërcënimeve të ndërsjella ose me armë që mbjellin shkatërrim, dhimbje dhe vdekje. Ato mund të arrihen vetëm përmes dialogut të arsyeshëm, të sinqertë dhe të përgjegjshëm. Përballë mundësisë së një tragjedie me përmasa të mëdha, u drejtoj një apel të sinqertë palëve të përfshira që të marrin përgjegjësi morale për të ndaluar spiralen e dhunës përpara se ajo të shndërrohet në një humnerë të pariparueshme.”
Bëri thirrje që të rifitojë diplomacia.
“Le të rifitojë diplomacia rolin e saj dhe të promovojë të mirën e popujve që dëshirojnë bashkëjetesë paqësore të bazuar në drejtësi. Le të vazhdojmë të lutemi për paqe. Ditët e fundit, ka pasur edhe lajme shqetësuese për përplasje mes Pakistanit dhe Afganistanit. Bëj thirrje për një rifillim urgjent të dialogut. Le të lutemi së bashku që harmonia të mbizotërojë në të gjitha konfliktet në botë. Vetëm paqja, një dhuratë nga Zoti, mund të shërojë plagët mes popujve.”
Papa Leoni u lut edhe për qytetarët e Brazilit të prekur nga përmbytjet.
