Bashkitë shqiptare siguruan gjatë vitit 2025 rreth 44.8 miliardë lekë të ardhura nga burimet e tyre, ku 91 për qind erdhën nga taksat dhe tarifat vendore, ndërsa vetëm 9 për qind nga burime të tjera.
Megjithëse të ardhurat u rritën me vetëm 0.8% krahasuar me një vit më parë, struktura e tyre tregon qartë se financat vendore mbështeten kryesisht tek aktiviteti ekonomik dhe ndërtimi.
Burimi më i madh i të ardhurave rezulton taksa e ndikimit në infrastrukturë, që paguhet për ndërtimet e reja. Vetëm kjo taksë solli 16.4 miliardë lekë, ose 37 për qind të të gjitha të ardhurave të bashkive.
Pas saj renditen tarifat vendore me 11.4 miliardë lekë dhe taksa mbi pasurinë me 8.1 miliardë lekë.
BURIMET KRYESORE TE TE ARDHURAVE
| Taksa e ndikimit në infrastrukturë | 16.4 mld lekë |
| Tarifat vendore | 11.4 mld lekë |
| Taksa mbi pasurinë | 8.1 mld lekë |
Por kur të ardhurat maten për çdo banor, diferencat bëhen edhe më të dukshme.
Mesatarisht bashkitë mblodhën 10,788 lekë për frymë, ndërsa surpriza vjen nga Himara që kryeson me mbi 212 mijë lekë për banor, rreth 20 herë mbi mesataren kombëtare dhe afro 188 herë më shumë se Këlcyra, e cila renditet e fundit. Pas Himarës vijnë Kamza dhe Kavaja.
TE ARDHURAT PER FRYME
| Lekë/banor | ||
| Himarë | 212,042 ↑ | |
| Kamëz | 35,047 ↑ | |
| Kavajë | 31,294 ↑ | |
| Has | 1,271↓ | |
| Këlcyrë | 1,125 ↑ | |
| Mesatarja e 61 bashkive | 10,788 | |
Raporti lidh këtë performancë me rritjen e aktivitetit ekonomik në disa bashki bregdetare.
Vetëm gjatë vitit 2025, Himara regjistroi edhe rritjen më të madhe të të ardhurave në vlerë absolute, e ndjekur nga Vlora, duke reflektuar ndikimin e turizmit, investimeve dhe zhvillimit të tregut të ndërtimit në financat vendore.
Ndërsa sezoni turistik po sjell më shumë vizitorë dhe investime në zonat bregdetare, raporti tregon se përfitimet fiskale nuk shpërndahen njësoj në të gjithë vendin.
Bashkitë me ekonomi më dinamike dhe aktivitet më të lartë turistik po krijojnë një avantazh të ndjeshëm financiar, ndërsa shumë bashki të vogla vijojnë të mbeten me kapacitete të kufizuara për të gjeneruar të ardhura.
