Një vajzë 25-vjeçare humbi jetën paraditen e sotme në Vlorë pasi u rrëzua nga një anije turistike.
Lidhur me këtë ngjarje të rëndë është arrestuar punonjësi i anijes ku ndodhi aksidenti fatal që i kushtoi jetën të resë. Gazetari i ABC, Elton Nikaj raporton se i arrestuari quhet Aleksandër Golemaj 47-vjeç. Sipas policisë i arrestuari nuk duhej të lejonte prezencën e 25-vjeçares në kuvertën e anije në një moment që ishte e ankoruar.
Turistja italiane 25 vjeçe ka humbur jetën pasi është rrëzuar aksidentalisht nga një anije. E reja mësohet se ka qenë në gjendje të dehur dhe në momentin që anija me turistë, në dukje pirate, është ankoruar, ajo ka dashur të zbresë.
Por, 25-vjeçarja ka rënë me kokë buzë portit dhe ka pësuar fraktura të rënda. Ajo është dërguar nga efektivët e policisë bregdetare në spitalin e Vlorës, por nuk ka arritur të mbijetojë, duke ndërruar jetë në duart e bluzave të bardha.
Në foto e publikuar në rrjetet sociale shihet se i arrestuari ishte i fiksuar pas kapitenit Jack Sparrow i cili është personazhi kryesor i serialit Pirates of the Caribbean.
