Rritja e çmimeve të fruta-perimeve ka sjellë boshatisjen e “Markatës së Shijes” në qytetin e Korçës. Ndryshe nga ditët e zakonshme, në këtë treg tashmë shihen kryesisht tregtarët e vegjël që ofrojnë produkte bujqësore, ndërsa blerësit janë gjithnjë e më të paktë. Sipas qytetarëve, rritja e çmimeve ka ndikuar drejtpërdrejt në fuqinë blerëse, duke mbajtur larg tregut sidomos pensionistët, të cilët e kanë të pamundur të përballojnë kostot e rritura të produkteve bazë ushqimore. “Me këto çmime nuk përballohet më. Marrim vetëm ato më të lirat dhe shumë gjëra i kemi hequr fare”, u shpreh një tragtar.
Nga ana tjetër, tregtarët shprehen se situata ka ardhur si pasojë e rritjes së çmimeve që në vendin e origjinës së produkteve. “Mall të mirë ka, por nuk blihet. Njerëzit marrin vetëm më të lirën, edhe pse cilësia nuk është e njëjtë”, tha një tjetër.
Krahasuar me një javë më parë, çmimet kanë pësuar rritje të ndjeshme. Nëse 1 kilogram domate kushtonte 250 lekë, aktualisht po shitet me 350 lekë. Po ashtu, specat nga 200 lekë për kilogram kanë shkuar në 300 lekë. Edhe fasulet, limoni, dhe perimet e tjera si sallata, trangulli etj., kanë pësuar rritje me 50 apo 100 lekë.
Rritja e çmimeve të produkteve të shportës ka ndikuar negativisht edhe në shitjet e supermarketeve dhe marketeve në Korçë.
