Gazetari Besnik Krasniqi ka thënë se Haradinaj ka qenë për një kohë sinonim i haraçit dhe Ardian Gjini ka thënë se ai ka qenë sinonim i haraçit ngaqë njerëzit kanë gënjyer.
Krasniqi më tej ka përmendur një rast kur truprojat e Haradinajt e kanë marrë peng një biznesmen dhe i kanë kërkuar 3 milionë euro haraç, transmeton Koha.net.
“Ka një aktgjykim që thotë dy truprojat e Haradinajt e kanë marrë peng biznesmenin me qëllim që t’i marrin 3 milionë euro dhe ata janë dënuar me 10 vjet burg”, ka thënë Krasniqi në “Rubikon” të KTV-së. Gjini për këtë ka thënë se dy truprojat janë dënuar dhe se AAK-ja duhej të jepte përgjigje nëse ata do të dirigjoheshin nga partia.
Gazetari Krasniqi ka përmendur edhe një rast tjetër, duke thënë se “Ka zyrtar të AAK-së që ka abuzuar me fondin për mbrojtjen e Haradinajt në Hagë…ai është dënuar sepse kishte të bënte me shpërlarje të parasë”, ka thënë Krasniqi, duke shtuar se Haradinaj për të qenë në rregull duhet të tregojë se prej kujt kanë ardhur financimet në parti dhe si e ka kryer shkollimi, veçanërisht atë të mesëm.
