Presidenti i Shteteve të Bashkuara, Donald Trump, ka publikuar një mesazh për Krishtlindje në Truth Social, ku ka ndërthurur urimet festive me sulme politike ndaj kundërshtarëve të tij.
Në postimin e tij, Trump uroi “Gëzuar Krishtlindjet për të gjithë”, përfshirë edhe atë që e cilësoi si “e majta radikale”, të cilën e akuzoi se po përpiqet të shkatërrojë vendin.
Kreu i Shtëpisë së Bardhë renditi një sërë arritjesh që, sipas tij, janë rezultat i politikave të administratës së tij.
Trump përmendi rritjen ekonomike prej 4.3% të Prodhimit të Brendshëm Bruto, uljen e krimit, mungesën e inflacionit dhe forcimin e sigurisë kombëtare.
“Gëzuar Krishtlindjet të gjithëve, përfshirë edhe fundërrinën e së majtës radikale që po bën gjithçka që është e mundur për të shkatërruar vendin tonë, por po dështon keq. Nuk kemi më kufij të hapur, burra në sportet e grave, transgjinorë, apo zbatim të dobët të ligjit. Ne jemi të respektuar përsëri, ndoshta si kurrë më parë”, tha Trump.
Ai theksoi gjithashtu se tarifat tregtare kanë sjellë, sipas tij, “triliona dollarë rritje dhe prosperitet” për ekonominë amerikane.
Mesazhi i presidentit u mbyll me thirrjen “Zoti e bekoftë Amerikën”, duke ruajtur një ton të fortë politik edhe në ditën e festës së Krishtlindjes.
