HELSINKI- Donald Trump dhe Vladimir Putin janë ulur ballë për ballë në Pallatin Presidencial finlandez përpara bisedimeve private ‘koke me koke’ 90-minutëshe që synon rindërtimin e lidhjeve mes SHBA-së dhe Rusisë. Samiti në Helsinki është një takim kokë më kokë dhe një drekë pune më e madhe, që do të përfundohet me një konferencë të përbashkët për shtyp.
Trump e përgëzoi Putinin për organizimin e suksesshëm të Kampionatit Botëror të Futbollit, përpara se të përvijonte disa nga temat që do të prekin gjatë bisedimeve.
“Dua t’ju përgëzoj për një Kampionat vërtet të mirë, një nga më të mirët”, tha Trump, duke shtuar se me Putinin do të diskutojë për “gjithçka”, nga tregtia deri te Kina.
Ai tha se shpreson se SHBA-ja dhe Rusia do të përfundojnë me “marrëdhënie të jashtëzakonshme” dhe se “bashkëpunimi me Rusinë është një gjë e mirë, jo një gjë e keqe”.
Gjithashtu Trump ka thënë se “kemi shumë gjëra të mira për të biseduar, që nga tregtia në Kinë”.
“Ne kemi mundësi të mëdha së bashku, nuk kemi shkuar mirë me vite”, ka shtuar Trump.
“Të kesh marrëdhënie të mira është një gjë e mirë”, ka thënë më tej Trump. “Bota dëshiron të na shohë të ecim së bashku”.
“Ne kemi 90% të armëve bërthamore në botë dhe kjo nuk është një gjë e mirë”, citohet të ketë thënë Trump.
Siç shkruan tutje TheGuardian, Putin dhe Trump gjithashtu patën një shtrëngim duarsh që zgjati rreth tre sekonda. Të dy dukeshin të tensionuar, ata nuk buzëqeshin shumë.
Derisa asnjë pyetje nuk është marrë nga gazetarët, pritet të zhvillohet edhe takimi i paraparë 90-minutësh “sy më sy” në mes të Trumpit dhe Putinit.
Është ky samiti i parë dypalësh i liderëve të të dyja vendeve qysh në prill të vitit 2010.
Përpara takimit, Trump tha se hetimet e agjencive amerikane mbi ndërhyrjen e dyshuar të Rusisë në zgjedhjet presidenciale në SHBA, më 2016, i kanë përkeqësuar rëndë marrëdhëniet e Uashingtonit me Moskën.
a.ç
