Administrata Trump ka pezulluar përkohësisht të gjitha aplikimet për imigracion nga shtetas të 19 vendeve jo-evropiane, duke përfshirë kërkesat për kartën e gjelbër dhe shtetësinë amerikane. Sipas memorandumit zyrtar, masa është marrë për shkak të shqetësimeve të rritura për sigurinë kombëtare dhe sigurinë publike.
Vendet e përfshira në këtë pezullim janë të njëjtat që në qershor iu nënshtruan kufizimeve të pjesshme ose të plota të udhëtimit, ndërsa vendimi i ri shton barriera të tjera për imigracionin, një prioritet i deklaruar i presidentit Donald Trump. Në listë përfshihen Afganistanin, Burmën, Çadin, Republikën e Kongos, Guinenë Ekuatoriale, Eritrenë, Haitin, Iranin, Libinë, Somalinë, Sudanin dhe Jemeni.
Memorandumi përmend sulmin e javës së kaluar në Uashington ndaj pjesëtarëve të Gardës Kombëtare, ku një shtetas afgan u arrestua si i dyshuar, si një nga arsyet që e shtyu administratën të rrisë kontrollet. Nga ngjarja, një efektiv humbi jetën dhe një tjetër u plagos rëndë.
Në deklaratat e ditëve të fundit, presidenti Trump ka përdorur retorikë të ashpër kundër disa komuniteteve emigrante, përfshirë somalezët, ndërsa administrata e tij ka vijuar të forcojë masat e zbatimit të ligjit të imigracionit që nga rikthimi në detyrë në janar. Përveç shtimit të prezencës së agjentëve federalë në qytetet kryesore, Shtëpia e Bardhë ka rritur edhe kthimin e azilkërkuesve në kufirin SHBA–Meksikë.
Lista e vendeve të prekura nga pezullimi përfshin Afganistanin, Burmën, Çadin, Republikën e Kongos, Guinenë Ekuatoriale, Eritrenë, Haitin, Iranin, Libinë, Somalinë, Sudanin dhe Jemenin. Po ashtu, kufizimet prekin edhe shtetasit e Burundit, Kubës, Laosit, Sierra Leones, Togos, Turkmenistanit dhe Venezuelës.
Politika e re parashikon pezullimin e menjëhershëm të të gjitha aplikimeve në proces, ndërsa të gjithë aplikantët nga këto vende do t’i nënshtrohen një rishqyrtimi të thelluar të sigurisë, që mund të përfshijë intervista shtesë ose riintervista, “për të vlerësuar çdo rrezik potencial ndaj sigurisë kombëtare dhe publike”.
Shoqata Amerikane e Avokatëve të Imigracionit njoftoi se ka marrë raportime për anulim të ceremonive të betimit për shtetësi, intervistave për natyralizim dhe intervistave për rregullim statusi, që prekën aplikantët e vendeve të përfshira në pezullim.
