Presidenti i Shteteve të Bashkuara, Donald Trump, deklaroi se SHBA-të nuk duhet të lejojnë Kinën të dominojë në fushën e inteligjencës artificiale dhe kriptovalutave, duke i cilësuar këto sektorë si vendimtarë për të ardhmen ekonomike dhe teknologjike.
Në një intervistë për Punchbowl News, të publikuar të premten, Trump u shpreh se nuk dëshiron ta shohë Kinën të marrë epërsinë në zhvillimin e inteligjencës artificiale apo në përdorimin e kriptovalutave.
“Nuk duam ta shohim Kinën të marrë përsipër kriptovalutat. Nuk dua ta shoh Kinën të fitojë me inteligjencën artificiale”, tha ai.
Trump theksoi se SHBA-ja aktualisht po kryeson garën ndaj Kinës në inteligjencën artificiale, duke argumentuar se vendi që fiton këtë garë do të ketë avantazhin më të madh global.
Sipas tij, inteligjenca artificiale do të ketë një ndikim shumë më të madh sesa interneti, duke e cilësuar atë si teknologjinë që do të tejkalojë çdo gjë të imagjinuar deri më sot.
Presidenti amerikan foli edhe për rritjen e përdorimit të Bitcoin, duke vënë në dukje se gjithnjë e më shumë njerëz po kryejnë pagesa me kriptovaluta, ndërsa përdorimi i parasë së gatshme po zbehet.
Ai shtoi se, nëse do të ishte guvernator i një shteti amerikan, do të ulte taksat për të tërhequr investime në qendrat e të dhënave, të cilat i konsideroi një burim të rëndësishëm të ardhurash dhe një element kyç në garën globale për inteligjencën artificiale.
“Nuk mund ta lejojmë Kinën të na mposhtë në këtë”, përfundoi Trump.
