Presidenti i SHBA, Donald Trump, ndoqi nga afër finalen e FIFA Club World Cup mes Paris Saint-Germain dhe Chelsea, të zhvilluar në stadiumin MetLife në New Jersey.
I shoqëruar nga Zonja e Parë Melania Trump dhe kreu i FIFA-s Gianni Infantino, Trump u prit fillimisht me duartrokitje, por një moment kur u shfaq në ekranin gjigant duke përshëndetur himnin kombëtar shkaktoi edhe disa fishkëllima, pas të cilave kamera u largua shpejt.
Prania e presidentit në këtë ndeshje lidhet me përpjekjet e tij për të kthyer ngjarjet sportive si simbole të “Epokës së Artë të Amerikës” gjatë mandatit të tij të dytë, ndërsa SHBA do të presë Kupën e Botës 2026 në bashkëpunim me Kanadanë dhe Meksikën.
Trump ka ndërtuar një raport të ngushtë me Infantinon, i cili e ka vizituar disa herë Shtëpinë e Bardhë. Sipas Infantino-s, Trump ka përqafuar rëndësinë e futbollit dhe është i lidhur me këtë sport edhe për shkak të pasionit të djalit të tij, Barron.
Megjithatë, si shpesh, politika nuk qëndroi larg. Në një takim të mëparshëm me ekipin e Juventusit, Trump shkaktoi polemika me deklaratat për sportistët transgjinorë dhe përfshirjen e grave në ekipet meshkujsh. Po ashtu, politika e tij për emigracionin ka ngritur shqetësime për ndikimin që mund të ketë te tifozët e huaj gjatë Kupës së Botës së ardhshme.
