Presidenti i SHBA-ve, Donald Trump, tha sot se “hapësira ajrore mbi dhe përreth Venezuelës do të mbyllet plotësisht”.
Në një postim në rrjetin e tij social “Truth Social”, Trump shkroi:
“Të gjitha linjave ajrore, pilotëve, kontrabandistëve të drogës dhe trafikantëve të qenieve njerëzore, ju lutemi të merrni parasysh se HAPËSIRA AJRORE MBI DHE PËRRETH VENEZUELËS DO TË JETË E MBYLLUR PLOTËSISHT!”.
Ky zhvillim vjen pas dërgimit të fregatave dhe flotës së rëndë detare në Karaibe prej disa javësh dhe akuzave ndaj presidentit Nicolas maduro se ka ndërtuar një narkoshtet.
Vetëm javën e kaluar dhe pak ditë më parë, u zbulua se Presidenti i SHBA-së Donald Trump kishte folur në telefon me Presidentin e Venezuelës Nicolas Maduro, pas një krize në marrëdhëniet midis dy palëve që mund të përshkallëzohet në armiqësi.
Të dy udhëheqësit u raportua se diskutuan gjithashtu një takim të mundshëm midis tyre, sipas Nju Jork Tajms, duke cituar njerëz të njohur me çështjen. Aktualisht nuk ka plane për një takim të tillë.
Sekretari i Shtetit i SHBA-së, Marco Rubio, ishte gjithashtu i pranishëm në bisedën që u zhvillua në fund të javës së kaluar. Disa ditë më parë, Axios raportoi se Trump dëshiron të ketë kontakte të drejtpërdrejta me Maduron.
