Presidenti amerikan Donald Trump ka konfirmuar se ndërroi fshehurazi avionin gjatë largimit nga samiti i NATO-s në Turqi muajin e kaluar, pas një kërcënimi të mundshëm ndaj tij. Trump u tha gazetarëve se kishte ndjekur udhëzimet e Shërbimit Sekret dhe ushtrisë amerikane, të cilët i kërkuan të udhëtonte me një avion tjetër.
Ndryshimi i avionit ndodhi më 8 korrik, pasi Trump ishte parë duke hipur në Air Force One përpara kamerave televizive. Sipas raportimeve, ai u transferua më pas në një avion ushtarak, ndërsa operacioni u realizua në mënyrë të fshehtë.
“Unë zgjedh Shërbimin Sekret dhe ushtrinë. Ata donin që unë të udhëtoja me një fluturim tjetër, një aeroplan tjetër. Thjesht duhet të bëj atë që thonë ata“, u tha Trump gazetarëve.
Zyrtarë amerikanë i kanë thënë CBS News se SHBA kishte zbuluar një kërcënim të besueshëm iranian për të qëlluar një raketë drejt avionit të presidentit. Ndërkohë, The New York Times raportoi se inteligjenca amerikane kishte marrë informacion për një person pranë samitit të NATO-s, i cili ishte parë me një raketë të lëshuar nga supi.
Trump ka deklaruar se avioni ushtarak ku u transferua ishte në një situatë edhe më të rrezikshme, ndërsa më herët kishte thënë se ishte “objektivi numër një” i Iranit gjatë samitit. Operacioni u mbajt i fshehtë edhe nga disa gazetarë dhe pjesëtarë të stafit të Shtëpisë së Bardhë që ndodheshin në avion, të cilët nuk ishin në dijeni se presidenti ishte larguar në kuadër të masave të sigurisë.
