Presidenti i Shteteve të Bashkuara, Donald Trump deklaroi se Irani ndodhet në një “gjendje kolapsi”, për shkak të presionit ekonomik të ushtruar nga SHBA-të dhe zhvillimeve që lidhen me Ngushticën strategjike të Hormuzit.
Në një postim në “Truth Social”, Trump tha se autoritetet iraniane kanë kërkuar hapjen sa më të shpejtë të kësaj rruge detare, ndërsa përballen me sfida të brendshme politike dhe ekonomike. Sipas tij, regjimi iranian po përpiqet të menaxhojë edhe çështjet që lidhen me udhëheqjen.
“Irani sapo na ka informuar se ndodhet në një ‘gjendje kolapsi’. Ata duan që ne ta ‘hapim Ngushticën e Hormuzit’ sa më shpejt të jetë e mundur, ndërsa përpiqen të zgjidhin situatën e tyre të udhëheqjes (gjë që besoj se do të arrijnë ta bëjnë!). Faleminderit për vëmendjen tuaj ndaj kësaj çështjeje!”, shkroi Trump.
Deklaratat e Trump vijnë në një periudhë tensionesh të vazhdueshme në rajon, ndërsa deri më tani nuk ka konfirmime për pretendimet e tij dhe as reagim zyrtar nga autoritetet iraniane.
