Nga Ilir Yzeiri
Fenomeni “Trump” nuk është më një iluzion, ai është bërë realitet dhe që prej datës 21 janar bota ka filluar të ndjehet ndryshe.
Donald Trump ka shpallur se Amerika do të jetë në qendër dhe se institucionet që u ndërtuan pas Luftës II Botërore për të siguruar paqen, për të ruajtur demokracinë dhe lirinë në botë apo për të siguruar rendin e ri botëror si NATO, OKB apo traktatet të tjera të rëndësishme, nuk do të jenë më prioritet i politikës së tij.
Ato institucione janë shpallur të konsumuara dhe Trump ka deklaruar se SHBA do ta rishikojë pjesëmarrjen në to.
Me gjasë, prej gjithë kësaj ka shans të përfitojë Rusia e Putinit dhe në këtë rast Ballkani mund të bjerë nën ndikimin e një politike që nuk i favorizon shqiptarët.
Shkurt, situata në botë nuk është aspak e mirë dhe ne, shqiptarët duhet të jemi të vëmendshëm.
Fqinjët rrotull nesh i kanë ende në tavolinë hartat e shekullit XIX dhe provokimet kanë nisur.
Në një klimë të tillë, shqiptarët e shekullit XXI do të duhej të ishin të bashkuar dhe të zhvillonin takime të niveleve të larta me moton Shqipëri mbi të gjitha.
Në një klimë të tillë, do të duhej të përjashtohej retorika kriminale politike dhe shqiptarët dhe aktorët politikë të shfaqeshin të bashkuar, më një strategji të qartë që projekti shqiptar i këtij shekulli të mos ndalej.
Mirëpo në vend të kësaj vazhdon spektakli banal me fotografi në shi rrugëve të Amerikës dhe publiku gënjehet me insinuata idiote se tani Trump do bëjë hatanë në Shqipëri.
Figura më groteske e gjithë kësaj historie është Lulëzim Basha dhe opozita mjerane e cila po përpiqet të shfaqet gati si qeveria amerikane në Shqipëri.
Po të dëgjosh hyneret e opozitës duhet të besosh që Trump flet në telefon çdo natë me Lulzim Bashën dhe se Edi Rama do përfundojë në hanxhar për punë ditësh.
Është e paimagjinueshme sesi kjo klasë politike nuk shqetësohet për fatin e vendit në rrethanat e reja politike, por ka vetëm një obsesion – pushtetin.
Dhe po ta shohësh hsitorinë e shtetit dhe të qeverisjes shqiptare, për fat të keq do të vëresh se nga viti 1912 e deri sa u pushtua Shqipëria, elitat politike thereshin brenda vendit për pushtet dhe fuqitë e mëdha i përdorinin jo për të mbrothësuar Shqipërinë, por për të vjedhur dhe për të rrëmbyer pushtetin përmes eleminimit të kundërshtarëve.
Enver Hoxha bëri aleancë edhe me djallin vetëm që të rrinte në pushtet dhe në këta njëzetë e ca vjet demokraci e kemi parë se si Sali Berisha ka bërë aleanca të dyshimta me serbët.
Projekti shqiptar i këtij shekulli sapo ka nisur dhe natyrisht gjendja e shqiptarëve nuk është si shumë vite më parë. Për fat të keq elitat politike nuk kanë ndryshuar, ndërsa shqiptarët janë shumë hapa larg tyre.
