Administrata e Donald Trump thuhet se ka përgatitur fshehurazi një plan paqeje për luftën në Ukrainë, sipas agjencisë së lajmeve Axios, e cila raporton se janë zhvilluar negociata me Rusinë. Burimet e informacionit vijnë nga zyrtarë amerikanë dhe rusë.
Sipas Axios, plani përfshin 28 hapa dhe është konceptuar të modelojë qasjen e përdorur në Gazë. SHBA-ja raportohet se po punon “fshehurazi” me Rusinë për të hartuar një kornizë të re që synon t’i japë fund konfliktit.
Plani përfshin elementë si “paqja në Ukrainë, garancitë e sigurisë, siguria në Evropë dhe marrëdhëniet e ardhshme të SHBA-së me Rusinë dhe Ukrainën”, tha një burim. Ai drejtohet nga i dërguari special amerikan, Steve Witkoff, i cili thuhet se e ka diskutuar gjerësisht planin me të dërguarin rus Kirill Dmitriev, sipas Axios që citon një zyrtar amerikan.
Edhe pse Ukraina do të informohej zyrtarisht vetëm pasi plani të finalizohej, burimet thonë se ka pasur diskutime paraprake disa ditë më parë midis Witkoff dhe Rustem Umerov, këshilltar i sigurisë i presidentit ukrainas, Volodymyr Zelensky. Presidenti Zelensky pritet të njihet me planin gjatë një takimi me Sekretarin e Ushtrisë së SHBA-së, Daniel Driscoll, dhe Shefin e Shtabit të Ushtrisë, Gjeneral Randy George, të cilët ndodhen tashmë në Ukrainë.
Zyrtarët evropianë janë gjithashtu duke u informuar nga SHBA-ja për këtë iniciativë. Shtypi amerikan shkruan se administrata Trump “është optimiste” për këtë opsion.
Vizita e Driscoll dhe George në Kiev është mbajtur diskrete, dhe sipas Reuters, vizita të tilla nga zyrtarë të lartë amerikanë në Ukrainë janë të rralla gjatë mandatit të Donald Trump, duke e bërë këtë ngjarje “jashtëzakonisht të pazakontë”.
Ndërkohë, Rusia vazhdon të përparojë në terren, megjithëse me ritëm të ngadaltë dhe të kujdesshëm. Plani i ri i paqes shfaqet në këtë kontekst, teksa SHBA-ja ka rritur mbështetjen për Ukrainën dhe ka autorizuar përdorimin e raketave ATACMS kundër objektivave brenda Rusisë.
Megjithatë, Moska po e minimizon rëndësinë e planit të raportuar. I pyetur nëse po zhvillohen diskutime që mund të çojnë në propozime të reja për paqe, zëdhënësi i Kremlinit, Dmitry Peskov, u përgjigj:
“Jo. Deri më tani nuk ka asgjë të re në këtë drejtim që mund t’ju komunikojmë”. Ai shtoi se nuk ka zhvillime të reja që prej takimit ndërmjet Trump dhe Putin, i cili, sipas Reuters, u mbajt në gusht në Alaska.
Aktualisht, Rusia kontrollon rreth 19% të territorit të Ukrainës.
