Shtetet e Bashkuara të Amerikës kanë hapur një tjetër front përplasjeje me Evropën, duke kërkuar këtë herë rritjen e çmimit të ilaçeve. Përmes një ofensive të gjerë diplomatike, administrata Trump po u bën presion qeverive evropiane që të shpenzojnë më shumë për industrinë farmaceutike.
Sipas Uashingtonit, është e padrejtë që pacientët amerikanë të paguajnë deri në tre herë më shtrenjtë se evropianët për të njëjtat medikamente. Në qendër të këtij presioni të madh ndodhet Gjermania, ku dy ministret e kabinetit po zhvillojnë bisedime mjaft konfidenciale me zyrtarët amerikanë.
Për ta shtuar akoma më shumë presionin, gjigantët farmaceutikë kanë nisur të anulojnë investimet miliardëshe në tokën gjermane. Si shembull suksesi, Uashingtoni po përdor modelin e Britanisë së Madhe, e cila pranoi të rrisë shpenzimet për barnat në këmbim të heqjes së tarifave tregtare. Nga ana tjetër, ekspertët evropianë shprehen mjaft skeptikë dhe paralajmërojnë se buxhetet publike të shëndetësisë nuk mbajnë dot më rritje çmimesh.
Në Europë tashmë po paguajmë shumë për ilaçet dhe qeveritë nuk mund t’i japin industrisë një çek të bardhë në këtë krizë ekonomike, u shpreh zyrtari evropian, Yannis Natsis. Ndërkohë, frika më e madhe e ekspertëve është se kompanitë mund të fshehin ilaçet e reja nga tregu evropian për të mos ulur fitimet në Amerikë. Kjo përplasje e re tregon qartë se pas tarifave dhe mbrojtjes, industria farmaceutike është kthyer tashmë në kryefjalën e krizës së re transatlantike.
