Presidenti i FIFA-s, Gianni Infantino, është përfshirë në një tjetër polemikë, pasi akuzohet se ka përdorur marrëdhëniet e tij me presidentin amerikan Donald Trump për të ndihmuar një punonjëse të tij të siguronte leje qëndrimi dhe pune në Shtetet e Bashkuara.
Sipas raportimit të The New York Post, bëhet fjalë për 33-vjeçaren Yajarlin del Socorro Fernandez, me origjinë nga Nikaragua, e cila punonte në banesën e Infantinos në Miami. Leja e saj për të qëndruar në SHBA ishte revokuar pasi administrata Trump anuloi, në qershor të vitit 2025, marrëveshjet me katër vende të Amerikës Qendrore.
Megjithatë, pavarësisht heqjes së lejes, Fernandez vijoi të ishte në listën e pagave të kreut të FIFA-s. Sipas pretendimeve të publikuara, Infantino më pas kërkoi ndihmën e ish-kreut të Federatës Amerikane të Futbollit, Carlos Cordeiro, për të lehtësuar qëndrimin e saj në Florida.
Një tjetër element që ngre pikëpyetje lidhet me aplikimin për vizë të tipit “C11”, i cili ishte miratuar në fillim të vitit 2026, por më pas u tërhoq. Në dokumentacion, Fernandez dyshohet se kishte deklaruar një adresë të ndryshme nga vendbanimi i saj real. Sipas New York Post, ajo jetonte në rezidencën luksoze të Infantinos, në kompleksin One Thousand Museum në Miami.
FIFA nuk ka pranuar të komentojë mbi këto pretendime.
Zbulimi vjen në një moment kur Infantino po përballet edhe me presion nga drejtuesit e UEFA-s për transparencë lidhur me disa çështje, mes tyre projekti i dështuar “FIFA Forward Enterprises”, ideja për t’u shitur investitorëve privatë një pjesë të të ardhurave të Botërorit, si dhe vendimi për t’i dhënë Donald Trumpit çmimin e parë të Paqes të FIFA-s.
Ndërkohë, UEFA kërkon të ketë akses në dokumentacionin përkatës, por FIFA u ka kërkuar anëtarëve të Këshillit, përfshirë edhe drejtuesen e Federatës Angleze, Debbie Hewitt, që të udhëtojnë drejt Zyrihut për të shqyrtuar dokumentet, pa pasur të drejtë t’i fotografojnë apo të bëjnë publike informacionet.
Në këtë klimë, ish-mbrojtësi i Tottenhamit, Ramon Vega, ka shpallur kandidaturën për të garuar kundër Infantinos për postin e presidentit të FIFA-s. Zgjedhjet pritet të zhvillohen gjatë Kongresit të 77-të të FIFA-s, në Rabat të Marokut.
