Duket se ka qenë një paralajmërim atentati me lëndë plasëse për nëndrejtorin e degës së ALUIZNI-t në Durrës, Gerti Aleksi.
Automjeti në pronësi të familjarëve të tij ka shpërthyer mbrëmjen e djeshme, teksa ndodhej i parkuar në lagjen Nr. 1 të qytetit bregdetar, pranë vendit të njohur “Bërryli”.
Sipas Policisë, në pjesën e përparme të makinës tip “Land Rover”, me targa AA780 OL, ishte vendosur një sasi e konsiderueshme eksplozivi, i cili ka shpërthyer rreth orës 18:15.
Pavarësisht se zona ku ishte parkuar makina kishte lëvizje të dendura të qytetarëve, fatmirësisht shpërthimi ka shkaktuar vetëm dëme materiale, kryesisht tek automjeti. Ndërsa paniku ka qenë i madh ndër kalimtarët dhe banorët e zonës përreth.
SHPËRTHIMI
Shpërthimi i fuqishëm tronditi mbrëmë Durrësin. Një sasi e konsiderueshme tritoli ishte e vendosur në pjesën e përparme të automjetit tip “Land Rover” fuoristradë.
Automjeti ishte parkuar në lagjen Nr. 1 të qytetit bregdetar, e njohur ndryshe si zona e “Vollgës”, pranë vendit ku banon familja Aleksi. Dëshmitarët i thanë policisë se shpërthimi ka qenë i fuqishëm, por dëme ka pasur vetëm tek automjeti dhe dera e parkimit para së cilës ishte lënë makina.
“Më datë 14.11.2016, rreth orës 18:15, në lagjen Nr.1 dyshohet se kanë vendosur një sasi të vogël lënde eksplozive në pjesën e përparme të mjetit tip fuoristradë, me targa AA 780 OL, në pronësi të shtetasit A.S. banues në Durrës, pa precedentë penalë.
Mjeti ka qenë i parkuar. Për pasojë janë shkaktuar dëme të vogla materiale, kryesisht në pjesën ku ishte vendosur lënda plasëse. Në vendngjarje ndodhen efektivët e Policisë, të cilët po punojnë për identifikimin e autorëve dhe zbardhjen e motiveve të ngjarjes”, sqaroi Policia nëpërmjet një njoftimi, por pa bërë të njohur faktin se makina përdorej nga numri dy i ALUIZNI-t, një ndër institucionet me interes për shumë qytetarë.
MOTIVI
Menjëherë në vendin e ngjarjes mbërritën forca të shumta policie, si dhe zjarrfikëse, për të shuar flakët që ishin përhapur në makinë. Një grup pune nisi verifikimet dhe hetimet për të zbardhur motivin e vendosjes së lëndës plasëse në automjetin me të cilin lëvizte nëndrejtori i ALUIZNI-t Durrës, Gerti Aleksi.
Burime nga grupi hetimor thanë për gazetën se hetimet për zbardhjen e ngjarjes janë përqendruar në dy drejtime: Konflikte të krijuara nga pozicioni i tij i punës, apo për probleme personale të vetë Aleksit.
Ndërkohë, po verifikohen edhe dyshime të tjera, ndonjë konflikt i mundshëm edhe i familjarëve të tij. Vetë Gerti Aleksi mësohet të ketë pohuar se nuk ka pasur probleme dhe konflikte me persona të tjerë dhe nuk e ka idenë se kush mund të fshihet pas sulmit me lëndë plasëse.
Ai ka pohuar se nuk ka pasur kërcënim deri tani. Gerti Aleksi është emëruar në këtë detyrë që prej vitit 2013.
Panorama/d.i.
