Një ditë pasi Partia Demokratike vendosi t’i rikthehet tryezës së ekspertëve për Reformën në Drejtësi, në kryesinë e Kuvendit nisi takimi i radhës ku do të diskutohen rekomandimet e Komisionit të Venecias.
Në qendër të diskutimeve mes ekspertëve të pozitës dhe opozitës mësohet se do të jenë çështja e mandateve të drejtuesve më të lartë të sistemit të drejtësisë si dhe kërkesa e PD-së që votimi për emërimet e reja në këtë sistem të bëhen me 3/5 e parlamentit dhe jo me 2/3.
Zyrtari i lartë i PD-së Tritan Shehu, bëri të ditur për Javanews se PD shkon në tryezë për të zbatuar rekomandimet e bëra nga Komisioni i Venecias dhe natyrisht çështja e diskutimit të mandateve dhe e mënyrës së votimit në Kuvend për kandidaturat e reja.
Sipas tij, kërkesa e PD-së është që votimi të jetë me 3/5.
“Nuk mund të hyj shumë në çështje teknike, pasi kjo është atribut i ekspertëve që janë në tryezë, por normalisht parimi bazë i PD-së është zbatimi i rekomandimeve ashtu siç janë shkruar të rekomandimeve të komisionit të Venecias”, u shpreh Shehu për Javanews.
Çështja e mandateve dhe e numërit të votave për emërimet e reja duket se është edhe e thembra e akilit që po mban pezull deri më tani konsensusin mes palëve politike në Kuvend.
