Tre shqiptarët e arratisur nga burgu Rebibbia në Romë janë parë në autostradë në veri të Italisë, sipas disa raportimeve. Policia italiane është vënë në alarm për kapjen e tyre, por përveç të dëshmive të sotme nuk ka pasur të dhëna të tjera për vendndodhjen e mundshme.
Mediat italiane raportojnë se policia ka shpërndarë gjithandej fotot e tre shqitarëve, Tesi Basho, Mikel Hasanbelliu dhe Ilir Pere dhe kërkon bashkëpunimin e qytetarëve për informacione.
Policia i kujton qytetarëve se ata janë të rrezikshëm dhe të gatshëm të bëjnë gjithçka, ndaj duhet të jenë të kujdesshëm.
Nga hetimet e para policia nuk ka më dyshime se ata kanë pasur mbështetje nga jashtë, në mos për arratinë, e sigurt për largimin dhe fshehjen ndërkohë që janë në kërkim.
Policia thotë se ata do të arratiseshin, edhe nëse nuk përfitonin nga tërmeti që ra, pasi plani i tyre ishte i përgatitur prej kohësh.
“Nuk kanë pasur asgjë për të humbur e me shumë mundësi kanë mbështetje të jashtme, persona që janë duke i ndihmuar”, thonë hetuesit.
Ndërkaq, në Itali kanë plasur polemikat për sigurinë e burgut të Rebibbias, pasi prej tij ka pasur disa arratisje dhe ajo e tre shqiptarëve ishte e fundit.
d.i.
