Mërgim Mavraj, Burim Kukeli dhe Odise Roshi humbasin ndeshjen e parafundit në grup për këtë edicion eliminator, të vlefshëm për kualifikueset e Botërorit 2018.
Mbrojtësi dhe dy mesfushorët u ndëshkuan në takimin e djeshëm ndaj Maqedonisë secili me nga një karton të verdhë, duke plotësuar në këtë mënyrë numrin e tyre.
Kësisoj, në takimin e 6 tetorit kundër Spanjës në stadiumin “Riko Perez” të Alikantes, tre titullarët kuqezi nuk do të jenë të gatshëm. Shansi i tyre i vetëm është pjesëmarrja në ndeshjen e fundit të këtij edicioni, pikërisht ndaj Italisë, më 9 tetor, në “Loro Boriçi”.
Duke qenë se Strumica është vetëm 90 minuta larg me makinë nga qyteti i Selanikut, dje në mbështetje të Kombëtares kishte ardhur edhe mesfushori Ergys Kaçe.
Lojtari korçar i PAOK-ut zuri vend në tribunën qendrore, ndërsa për këto dy ndeshje nuk ishte grumbulluar nga trajneri Kristian Panuçi. Në momentin e golit, Kaçe u çua në këmbë./PanoramaSport/a.m.
