Po afrojnë muajt e ngrohtë dhe trupi ynë do ketë nevojë për hidratim. Në përpjekje për të zëvendësuar vlerat ushqimore që humbasim kur djersijmë, u jepemi pijeve me sheqer, që kanë një aftësi “mashtruese” për të prodhuar energji të menjëhershme e krijojnë një ndjesi të përkohshme mirëqenieje. Të konsumosh ujë është vlerë e paçmuar për organizmin e dehidratuar, por imagjinoni sikur ta pasuronit atë me fruta, erëza e perime, duke i shtuar në këtë mënyrë jo vetëm vlerat ushqyese, por dhe duke e bërë më tërheqës për syrin. Po flasim pikërisht për ujërat e aromatizuar, që përftohen thjesht, në një kohë të shkurtër dhe janë të shëndetshme…
Të gjitha agrumet
Përbërësit: ½ kokërr portokall normal, ½ kokërr portokall i shartuar me shegë, 3 feta limon, 3 feta lime, ½ kokërr qitro e verdhë, ½ kokërr qitro e kuqe, 2 kokrra mandarinë dhe ujë. Përgatitja: Për këtë recetë na duhet një kavanoz i madh, i mbushur me ujë deri në 2/3 e tij. I presim frutat në feta. Thelat e mandarinës i shpojmë në vende të ndryshme me majën e thikës, por me kujdes, që të mos squllen. Kështu ato do të lëshojnë më tepër shije e lëng. I hedhim në kavanoz, të cilin e mbyllim me kapak. Kjo është një “bombë” me Vitaminë C, ideale për periudhën e pranverës, të mbushur me viroza dhe alergji.
Kivi, luleshtrydhe dhe kopër
Përbërësit: 4 luleshtrydhe të mëdha, 1/2 kivi, kopër dhe ujë. Përgatitja: Kivin që do përdorim e presim në copa të vogla, bashkë me luleshtrydhen dhe i hedhim në kavanozin e mbushur me ujë pak të ftohtë. E mbyllim kavanozin me kapak dhe e lëmë në frigorifer gjithë natën. Në mëngjes, uji është gati për t’u shijuar!
Luleshtrydhe, limon dhe borzilok
Përbërësit: 4-6 luleshtrydhe, të qëruara dhe të prera në katër pjesë, ½ limon, i prerë në feta, një grusht me borzilok, ujë i pastër. Përgatitja: Mbushim 2/3 e kavanozit me ujë dhe fruta. Fletët e borzilokut, përpara se t’i shtojmë në kavanoz, i shtypim me një lugë druri, sa të lëshojnë lëngun dhe shijen, pasi ndryshe nga frutat,ai do të lëshonte vlerat e veta më ngadalë dhe me vështirësi nëse e vendosim të paprekur në enë. Uji del më i mirë nëse lihet të marrë shijen e frutave për një orë.
Living
