Travis Kelce ka folur për herë të parë publikisht për dasmën e tij me Taylor Swift, duke e përshkruar ceremoninë në New York si “natën më të bukur të jetës”.
Gjatë një konference për shtyp të mërkurën, ylli i Kansas City Chiefs u pyet për ceremoninë e shumëpërfolur me këngëtaren 36-vjeçare. Kelce, 36 vjeç, e përshkroi periudhën e dasmës si një moment të veçantë jashtë sezonit të futbollit.
“Ishte një periudhë fantastike jashtë sezonit”, tha ai, përpara se ta cilësonte dasmën si “natën më të bukur të jetës sime”.
Sportisti falënderoi të gjithë të ftuarit që morën pjesë në festë dhe ndanë me çiftin këtë moment.
“E vlerësoj të gjithë ata që erdhën, festuan dhe u argëtuan me ne. Ishte një natë e çmendur, plot festime”, u shpreh Kelce.
Por pas ceremonisë dhe festimeve, për të ka nisur një tjetër kapitull: rikthimi në futboll.
“Tani është koha për futboll”, tha Kelce nga kampi stërvitor i Kansas City Chiefs.
Taylor Swift dhe Travis Kelce u martuan më 3 korrik në Madison Square Garden, në New York, në një ceremoni ku morën pjesë rreth 1,000 të ftuar.
Për Kelce, zgjedhja e këtij vendi kishte edhe një domethënie personale. Ai tregoi se gjithmonë kishte ëndërruar të ishte në një ndeshje të madhe në Madison Square Garden dhe se martesa aty e bëri momentin edhe më të veçantë.
“Gjithmonë i kam thënë vetes se do të shkoja në një ndeshje playoff-i kur Knicks të ishin në kulmin e tyre”, tregoi ai.
“Por ishte shumë bukur të realizoja ëndrrën e fëmijërisë për të qenë në atë vend, tempullin e të gjitha ambienteve sportive, dhe më pas të martohesha aty. Ishte perfekte”, shtoi Kelce.
Me humor, ai zbuloi edhe një detaj të thjeshtë nga ceremonia: “Kondicioneri ishte fantastik. Kjo ishte pjesa më e mirë.”
Ceremonia u zhvillua përpara një liste të gjatë të ftuarish VIP, mes tyre Gigi Hadid, Sabrina Carpenter, Brad Pitt, Jennifer Lopez dhe Nelly.
Madison Square Garden u transformua për dasmën, me pemë, qilima që imitonin barin, tavolina, bare dhe dekorime në ngjyrat jeshile të errët dhe rozë.
Swift zgjodhi këngën e saj të vitit 2008, “Love Story”, për të ecur drejt altarit, ndërsa çifti veshi veshje Christian Dior Haute Couture. Ceremonia u drejtua nga aktori Adam Sandler.
Të ftuarit morën pjesë edhe në lojëra me çmime luksoze, mes tyre çanta të markave të njohura dhe ora Cartier.
Në ceremoninë e martesës, Taylor Swift zgjodhi vëllain e saj, Austin Swift, si “Man of Honor”, ndërsa Travis Kelce kishte pranë vetes vëllain e tij, Jason Kelce, si “Best Man”.
Pas një dasme të mbushur me të ftuar, muzikë dhe festime, Kelce tashmë është rikthyer në përgatitjet për sezonin e ri të NFL.
