“Transport publik falas”, ishte një premtim i kryetares aktuale të Qytetit të Shkupit, Danela Arsovska në zgjedhjet për pushtet vendor të vitit 2021. Edhe pse kaloi gjysma e mandatit, ky premtim nuk po realizohet. Për kundrazi, gjendja në Ndërmarjen për Transport Publik në Shkup nuk lejon realizimin e premtimit në dy vitet e mbetura të mandatit të Kryetares së Shkupit.
Ishte një nga projektet prioritare të Arsovskës që ajo e paralajmëroi gjatë fushatës zgjedhore, duke i siguruar shkupjanët se me këtë do të zgjidhet kaosi i trafikut në qytet. Megjithatë, kjo nuk ka ndodhur deri më tani. Nuk ka transport urban falas për të gjithë qytetarët, por si më parë, nxënësit, studentët dhe pensionistët që shfrytëzojnë këtë mundësi udhëtojnë me autobus falas katër ditë në javë – të martën, të premten, të shtunën dhe të dielën. Transporti falas për këto kategori qytetarësh u anulua në pranverën e vitit 2020 për shkak të mbrojtjes nga përhapja e koronavirusit dhe u rikthye sërish në fund të marsit të këtij viti pas lehtësimit të masave për pandeminë.
Për mosrealizimin e premtimit, kryetarja Danela Arsovska u arsyetua me krizën e rëndë energjetike që goditi vendin dhe shtetet e tjera të rajonit. Pas disa muajsh, Arsovska tha që premtimi do të realizohet pasi pasi të eliminohen borxhet e NTP-së, e cila është në humbje të madhe.
Ndërmarrja publike e transportit në qytetin e Shkupit këto dy vite përballet me probleme të shumta. Ka pasur protesta të transportuesve dhe ndërprerje të linjave të rregullta ditore. Shkak u bë vonese e pagesave për muaj të tëra nga kjo ndërmarrje.
Paraardhësi dhe kundërkandidati saj për kryetar të Shkupit, Petre Shilegov, këtë propozim të Arsovskës e vlerësoi si populist në fushatën për zgjedhjet lokale, duke theksuar se nëse Qyteti i Shkupit do ta mbulonte të gjithë transportin publik, atëherë nuk do të mbeteshin para për aktivitetet tjera të qytetit.
Ndërmarrja publike e transportit në Shkup ka një nga buxhetet më të mëdha, por është e varur nga shteti dhe qyteti i Shkupit. Të hyrat e përgjithshme në vitin 2020 ishin 1,68 miliardë denarë, por 715 milionë denarë ishin ndihmë nga Qyteti i Shkupit dhe Ministria e Arsimit dhe Shkencës. Në përmbledhje, ndërmarrja në vitin 2020 kishte në dispozicion më shumë se 27 milionë euro. Shkupi ka 526.502 banorë, dhe premtimi nuk mund të realizohet tani e dy vite.
Një premtim identik për transport falas po jep edhe kandidati i koalicionit “Bashkë Fitojmë” për Bashkinë Tiranë, Belind Këlliçi. Ky i fundit ka premtuar se nëse ai fiton në zgjedhjet e 14 majit, do të realizojë shërbimin e transportit publik falas për qytetarët e Tiranës me popullësi rreth 1 milion banorë. Transporti publik Tiranës i kushton gati 1.5 milionë euro në muaj apo 16.5 milionë euro brenda një viti.
Madje Këlliçi thotë që transporti publik do të modernizohet që nënkupton investim shtesë në transportin publik. Premtimi i Këlliçit duket që do të përfundon si premtimi i kryetares së Shkupit, Danela Arsovska. As Shkupi dhe as Tirana nuk u ngjajnë as kryeqendrës së Estonisë, Talinit dhe as Luksemburgu, dy qytetet e vetme që kanë transport falas në të gjithë Europën./flaka.com.mk
