Bashkia e Tiranës hapi dje tenderin për realizimin e terminalit të transportit publik në kryeqytet. Kjo bëhet e ditur përmes një njoftimi zyrtar nga Agjencia e Prokurimit Publik, në të cilin Bashkia fton operatorët ekonomikë të jenë pjesë e garës për projektin me vlerën e 15.5 milionë eurove me një kohëzgjatje nga 15 deri në 35 vjet.
Në njoftim nënvizohet se autoriteti kontraktor do të marrë parasysh vetëm ofertat tenderuese që kanë kaluar kufijtë minimalë, të përcaktuar në kriteret e kualifikimit. Në udhëzimet e përgjithshme thuhet se ofertat mund të pranohen deri në muajin nëntor, ndërsa janë të detajuara edhe dokumentet që duhen bërë gati për t’u dorëzuar.
“Ofertuesi e përgatit dhe dorëzon ofertën e tij në faqen e internetit të Agjencisë Shqiptare të Prokurimit Publik. Dosjet e ngarkuara në këtë faqe janë të njëjta me ato të ofertës origjinale në format dhe të nënshkruara”, thuhet në njoftim, ndërsa theksohet se çdo ofertë në rrugë tjetër duhet të refuzohet.
Ajo iu nënshtrohet tri lloj vlerësimeve: teknik, financiar dhe administrativ. Komisioni i vlerësimit të ofertave është ai që vlerëson dhe rendit ofertuesit. Në rast se njëri prej tyre gjykon për një veprim të padrejtë, mund të kërkojë rishikim administrativ. Vetëm pas shqyrtimit të ankimeve shpallet ofertuesi më i suksesshëm, që rrjedhimisht ka marrë rezultatin më të lartë.
Fituesi i tenderit duhet të ndërtojë terminalin me kapacitet të plotë për autobusë urbanë, për shërbimin taksi me qëllim zhbllokimin e trafikut dhe lehtësimin e lëvizjes së qytetarëve. Gjithashtu, në kontratë parashikohet edhe mirëmbajtja e tij, ndërsa autoriteti kontraktor do të ofrojë një truall prej 85 mijë metrash katrorë vendosur përgjatë korridorit kryesor që çon në veriperëndim, nga qyteti në drejtim të Durrësit.
Terminali do të jetë stacion për autobusët, stacion për pasagjerët, parkim dhe hapësirë publike për komoditetin e udhëtarëve. Sipas projektit, të gjitha tarifat e vendqëndrimit të autobusëve, të ardhurat e qiradhënies me pakicë dhe tarifat e parkimit do të arkëtohen nga kompania që do të fitojë garën për ndërtimin e terminalit.
Panorama/d.i.
