Nënkryetari i Bashkisë së Tiranës, Arbian Mazniku, është takuar me përfaqësues të Shoqatës së Transportit.
Këta të fundit kërkojnë rritjen e çmimit të biletës nga 30 në 70 lekë, gjë që deri tani është kundërshtuar nga kryetari i Bashkisë, Erion Veliaj. Kryebashkiaku ka thënë se është i hapur për bisedime, ndonëse premtoi se “sa të jem unë kryetar, nuk do të ketë rritje çmimi”.
Pas takimit, Mazniku ka tha se nuk është diskutuar rritja e çmimit, por vetëm e cilësisë së shërbimit.
“Ne diskutojmë cilësinë e shërbimit, jo rritjen e çmimit”, tha Mazniku.
“Çmimi do të diskutohet vetëm pasi të plotësohen kushtet e reformës sonë në transport, që përfshijnnë shtrirjen e rrjetit në të gjithë qytetin”.
Shoqata e Transportit ka kërcënuar me ndalim shërbimi më 1 janar, por Mazniku tha se “do të gjejmë mekanizma që qytetit mos t’i mungojë asnjë sekondë shërbimi urban”.
I pyetur në lidhje me vdekjen e foshnjës tremuajshe nga i ftohti, nënkryetari tha se nuk ka pasur dijeni për gjendjen dhe i bëri thirrje kryetarit të PD, Lulzim Basha, të mos bëjë politikë me vdekjen e foshnjës.
“Jemi tmerrësisht të prekur nga kjo ngjarje. Stafi i bashkisë ka shkuar të takohet me familjen. Kemi marrë të gjitha masat për të lehtësuar dhimbjen e tyre. Nuk ishim vënë në dijeni për situatën, pasi familja kishte pak ditë që ishte shpërngulur nga Peqini. Një person është ai që nuk lë rast pa kërcyer vallen e vdekjes, del dhe sot bën kukuvajkën. Ai nxori komunitetin rom nga barakat që të linte Delijorgjin të ndërtonte. Qytetarët e dinë shumë mirë dhe nuk e falin këtë person që bën politikë me një ngjarje kaq të trishtë”, tha Mazniku.
