Zona TID Tirana, e inkorporuar në projektin e Pazarit të Ri, ka transformuar në një pol të rëndësishëm zhvillimi të gjithë këtë pjesë duke ndikuar në rritjen me 43 % të bizneseve dhe vlerë më të lartë pronës.
Sipas relacionit që shoqëron projektligjin e ri për “Zonat TID”, bashkëpunimi i Fondit Amerikano Shqiptar të Ndërmarrjeve (AADF), me Bashkinë Tiranë dhe qeverinë shqiptare bëri që zona të ndryshonte krejtësisht pamje dhe menaxhim”.
Kësaj iniciative më pas i janë bashkuar bizneset e zonës, të cilat kanë investuar rreth 7.7 milionë dollarë. Shifër kjo e angazhuar në biznese të reja dhe në ato ekzistuese. Investimi i lartëpërmendur është reflektuar dhe në tregues të tjerë.
Në zonën e Pazarit të Ri, 43% e bizneseve të anketuara shprehen se kanë rritur shitjet dhe 41% e bizneseve kanë pasur vlera të shitjeve në nivele të njëjta dhe vetëm 16% kanë patur shitje më të ulëta.
Një ndër indikatorët më të rëndësishëm të projektit është frekuentueshmëria. Rekordi i regjistruar arriti shifrën e 15 000 vizitorëve në ditë” shkruhet në relacionin e projektligjit “për Përmirësimin e Zonave të Biznesit”, citon relacioni që është depozituar në Kuvend.
Në relacion jepen detaje të asaj çfarë ka ndodhur në zonën e Pazarit të ri të Tiranës.
Referuar relacionit, investimi në zonën e Pazarit të Ri duket se ka dhënë efektet e tij edhe në rritjen e vlerës së pronës, e cila, sipas referimeve të Bashkisë Tiranë është 30-40 % më e lartë. E shprehur ndryshe, nga vlera 700 deri 850 euro/m2 tani vlera e pasurive apo e objekteve të banimit shkon më shumë se 1 300 euro/m2
Në total në hapësirën në fjalë operojnë rreth 374 biznese, nga të cilat 168 ushtrojnë aktivitetin tek markata e fruta-perimeve. Brenda Pazarit operojnë 68% e bizneseve dhe 32% ndodhen jashtë tij. Tipologjia e bizneseve është e shumëllojshme. Sipas shifrave zyrtare, 54.2 % e tyre janë shitës ushqimorë (bulmet, fruta-perime, peshk etj.) 16.5% e tyre janë biznese të tjera joushqimore dhe 17.5% janë kryesisht restorante dhe kafe .
Aktualisht, shoqata TID Tirana ofron shërbimet e pastrimit shtesë të zonës, të sigurisë private në zonë, të magazinimit të produkteve të markatës së frutave e perimeve, si dhe të konsulencës për bizneset në lidhje me programet e granteve dhe të shfrytëzimit të hapësirës publike, në koordinim me Bashkinë Tiranë.
