Elseid Hysaj vazhdon t’i mahnitë të gjithë në Itali, edhe pse tashmë nuk përbën më surprizë. Mbrojtësi kuqezi u transferua te Napoli një vit më parë nga Empoli dhe menjëherë tregoi se skuadra nënkampione e Italisë nuk kishte gabuar me të.
Por të njëjtën paraqitje të shkëlqyer ka bërë edhe me kombëtaren e Shqipërisë, ku nuk është i rrethuar nga yje të kalibrit të Napolit. Ndaj edhe media në Itali është shpeshherë e interesuar të përcjellë të reja nga shkodrani që tashmë është shënjestruar edhe nga klube më të mëdhenj.
Ndihmëstrajneri i kuqezinjve, Paolo Tramezzani ka deklaruar për Radio Punto Zero se Hysaj shkonte në stërvitje një orë para të tjerëve.
“Hysaj mund të përmirësohet në disa drejtime dhe vetë ai e di i pari këtë gjë. Stërvitet me një vendosmëri të admirueshme”, thotë Tramezzani. “Me Kombëtaren vinte gjithmonë në fushë një orë përpara shokëve dhe stërvitej individualisht, pa ia kërkuar”.
d.i.
