Pesë persona me nënshtetësi shqiptare rezultojnë të plagosur si pasojë e aksidentit tragjik hekurudhor në Greqi. Ministria për Europën dhe Punët e Jashtme njoftoi se këta persona janë jashtë rrezikut për jetën dhe po trajtohen në kushte spitalore.
“5 persona me nënshtetësi shqiptare rezultojnë të plagosur, jashtë rrezikut për jetën e po trajtohen në kushte spitalore. Po vijohet me identifikimin e tyre”, tha Ministria e Jashtme.
Bazuar në komunikimin e fundit që ambasada dhe konsullata shqiptare në Greqi kanë patur me autoritetet vendase deri më tani nuk ka informacion për shtetas shqiptarë në radhët e viktimave.
38 persona humbën jetën si pasojë e aksidentit të së martës që ndodhi në Tempi, pranë Larisës. Dy trena, një i mbushur me pasagjerë dhe tjetri me mallra, u përplasën duke shkaktuar një tragjedi të vërtetë, më e madhja në Greqi sa i përket transportit hekurudhor.
Si pasojë e përplasjes mbetën të plagosur mbi 85 persona. Në momentin e aksidentit në trenin me pasagjerë udhëtonin rreth 350 persona.
/a.r
