Në një lidhje direkte për “Opinion” nga spitali i Traumës në Tiranë, Ardian Meslani, babai i 8 vjeçarit të plagosur prej aksidentit të ndodhur në Durrës dy ditë më parë. Me zërin që i dridhet dhe thellësisht i prekur, ai tregoi se djali i tij ndodhet jashtë rrezikut për jetën, por se do t’i nënshtrohet një ndërhyrjeje kirurgjikale.
Ndau një detaj rrëqethës, që vogëlushi kërkon vazhdimisht shokët e tij, pa e ditur se ata kanë ndërruar jetë.
-Ju uroj shërim sa më të shpejtë të djalit dhe shpresoj që gjithçka të shkojë sa më mirë. Ngushëllime për rastin tjetër! Në çfarë gjendje është?
Meslani: Djali tani është jashtë rrezikut për jetën, jemi në mes të një ndërhyrjeje.
-Do bëhet në Shqipëri?
Meslani: Do bëhet këtu te Trauma.
-Çdo gjë është në rregull në spital, vëmendja, kujdesi?
Meslani: Vëmendja është në rregull, po unë kam edhe dy fëmijë të tjerë te shtëpia, kanë nevojë për psikolog.
-Nuk ju kanë çuar psikologë fare për të qetësuar familjen?
Meslani: Jo fare absolutisht!
-Si është gjendja në familje?
Meslani: Super e rënduar?
-A të tha djali në çfarë rrethanash ka ndodhur ngjarja?
Meslani: Vetëm dicka më ka thënë, kërkon shokët e vet dhe thotë erdhi makina me shpejtësi, na mori përpara!
-Ju nuk i keni thënë gjë?
Meslani: Jo, jo! Edhe këtu kemi një psikologe private.
Për shoferin e dehur që përplasi fëmijët, Meslani tha se e njihte dhe se e ka denoncuar disa herë për shpejtësinë e tejkaluar.
“Të marrin telefonin ta shohin. Jo vetëm unë, por gjithë lagjia. Vinte një patrullë kalonte, e shihte të parkuar dhe ikte”, rrëfeu ai.
“Jemi shumë të tronditur”, përfundoi ai me lot në sy.
Ngjarja tronditëse ndodhi më 3 maj, në mes të ditës, kur shoferi në gjendje të dehur përplasi për vdekje dy të mitur dhe la të plagosur një tjetër. Një lajm i kobshëm dhe që ngjalli reagime të ashpra sa i takon sigurisë së të miturve në rrugë apo hapësira të tjera publike.
Edhe në Kuvend u fol lidhur me ngjarjen, ndërsa mazhoranca paralajmëroi ndryshime në Kodin Penal. Policisë së Shtetit iu bë apel për vigjilencë të shtuar dhe “që të fortët e lagjeve të bëhen shembull”.
