Pas aksidentit tragjik në Spitallë të Durrësit, një tjetër shqetësim vjen nga banorët e zonës së Arapajt në Durrës. Pas shqetësimeve të vazhdueshme nga dy të rinj, ata kanë njoftuar se do të protestojnë sot në orën 10:00, në lagjen e tyre.
Sipas tyre, një 22-vjeçar dhe motra e tij 20-vjeçare, e cila vazhdon studimet për t’u bërë efektive policie, dyshohet se rreth dy javë më parë ka plagosur me thikë një komshie dhe e ka dhunuar fizikisht pas një konflikti për parkimin. Për këtë ngjarje, sipas banorëve, ekziston edhe një njoftim zyrtar i policisë i datës 26 prill.
Banorët pretendojnë se dy të rinjtë lëvizin me shpejtësi në rrugët e ngushta të lagjes dhe kanë përplasur qëllimisht automjetet e fqinjëve, duke rrezikuar sigurinë e komunitetit.
Rreth 20 familje kanë bërë denoncime të përsëritura në polici, por sipas tyre, situata jo vetëm që nuk është zgjidhur, por është përkeqësuar. Banorët kanë qëndruar për më shumë se 6 orë në komisariat për të kërkuar zgjidhje, por janë larguar pa marrë një përgjigje.
Për këtë arsye, ata kanë vendosur të dalin në protestë dhe u bëjnë thirrje mediave të jenë të pranishme për të pasqyruar situatën.
Njoftimi i banorëve
Në orën 10:00 banorët e Arapajt do të protestojnë në lagjen e tyre për një situatë të ngjashme me “Bishën”!
Një 22 vjeçar dhe motra e tij 20 vjeçe (kjo e fundit vazhdon studimet për efektive policie, por dy javë më parë ka plagosur me thikë komshien dhe e ka rrahur brutalisht për parkim- keni njoftim policie me datë 26 prill), janë persona problematik në zonë, duke ecur me shpejtësi në rrugica të banueshme dhe duke përplasur makinat e fqinjëve qëllimisht.
Pasi 20 familje i kanë denoncuar me dhjetëra herë në polici, por të rinjtë vazhdojnë dhe agravojnë sjelljen. Të ndjerë nën rrezik, banorët kanë qëndruar në rajon për mbi 6 orë gjatë ditës së sotme për këtë çështje dhe janë larguar pa asnjë përgjigje. Për këtë arsye do të protestojnë në lagjen e tyre në Arapaj dhe kërkojnë praninë e të gjithë mediave.
