Një nënë dhe tre fëmijët e saj, 16, 8 dhe 7 vjeç, kanë humbur jetën në një zjarr tragjik në banesën e tyre në Bootle, Merseyside, në Angli.
Hetimi ka zbuluar se zjarri u shkaktua nga një bateri litium-jon, që pësoi një proces të njohur si “thermal runaway”, duke gjeneruar nxehtësi në mënyrë të pakontrolluar. Elisha Brabin, 36 vjeçe, dhe fëmijët e saj Leo Brabin, 16 vjeç, Ellis Brabin, 8 vjeç dhe Prudence Brabin, 7 vjeçe, u gjetën nga zjarrfikësit në një dhomë gjumi në katin e sipërm të banesës së tyre në Stone Square.
Shërbimet zjarrfikëse u njoftuan rreth orës 03:45 të mëngjesit të së martës, më 22 shtator. Ndërkohë një person i pestë u dërgua në spital me djegie.
Sipas hetimit të Shërbimit të Zjarrfikësve dhe Shpëtimit të Merseyside, zjarri nisi pas një incidenti elektrik që bëri që bateria litium-jon të hynte në fazën e “thermal runaway”. Ky fenomen ndodh kur bateria prodhon më shumë nxehtësi nga sa mund të çlirojë në mënyrë të sigurt, duke shkaktuar një rritje të shpejtë dhe të pakontrolluar të temperaturës.
Autoritetet nuk kanë konfirmuar se për çfarë pajisjeje përdorej bateria, por bateritë litium-jon përdoren gjerësisht në biçikletat elektrike dhe skuterët elektrikë.
Kev Johnson, drejtues i parandalimit pranë Shërbimit të Zjarrfikësve dhe Shpëtimit të Merseyside, e cilësoi ngjarjen si tragjike dhe tha se përpjekjet e zjarrfikësve dhe ekipeve mjekësore nuk mundën të ndryshonin fatin e familjes, për shkak të shpejtësisë dhe intensitetit të flakëve.
“Tragjedia nxjerr në pah rreziqet reale që paraqesin bateritë litium-jon”, tha Johnson.
Shërbimi zjarrfikës u ka bërë thirrje qytetarëve të përdorin vetëm bateri dhe karikues të rekomanduar nga prodhuesi dhe të respektojnë udhëzimet për përdorimin e tyre. Gjithashtu, qytetarët këshillohen të ndalojnë menjëherë përdorimin e baterisë nëse ajo fryhet, nxjerr zhurma të pazakonta, lëshon erë të fortë, nuk karikohet siç duhet ose nxjerr tym.
Sipas të dhënave të shërbimit zjarrfikës, në Merseyside janë regjistruar 150 zjarre të lidhura me bateritë litium-jon nga prilli 2023 deri në gusht 2026. Pesë persona kanë humbur jetën në këto incidente.
Familjarët e Elishës e kanë përshkruar atë si një nënë të përkushtuar, për të cilën fëmijët ishin “e gjithë bota”. Ata thanë se Leo, Ellis dhe Prudence ishin të dashur pa masë dhe se humbja e tyre i ka lënë të shkatërruar.
“Largimi tragjik i Elishës dhe tre fëmijëve tanë të çmuar na ka lënë me zemër të thyer. Të gjithë u morën nga ne shumë shpejt. Humbja që po përjetojmë është e paimagjinueshme dhe ndikimi tek familja jonë do të ndihet përgjithmonë”, thanë familjarët.
Pas tragjedisë, fqinjët kanë ngritur një fushatë për mbledhjen e fondeve për familjen, e cila ka siguruar më shumë se 12 mijë paund. Organizatori i saj, Loti Nambombe, tha se komuniteti dëshironte të ndihmonte familjen për shpenzimet e funeralit apo nevoja të tjera.
Fqinjët kanë treguar se, pasi dëgjuan britmat gjatë zjarrit, dolën në rrugë dhe u përpoqën të ndihmonin. Disa prej tyre tentuan të hynin në banesë, të siguronin shkallë apo të thyenin dritaret për të nxjerrë familjarët.
Në vendin e tragjedisë janë vendosur lule, qirinj, lodra dhe fotografi të familjes, në kujtim të nënës dhe tre fëmijëve.
