Policia Kufitare e Kakavijës ka ndaluar këtë të dielë një 31 vjeçar të cilit i janë gjetur një seri sendesh të vjetra prej metali, argjendi e bronxi që do të shiteshin në tregun e zi.
Sendet antike ishin sjellë nga shtetasi Petrit A, banues në Tiranë, nga Greqia në Shqipëri, me qëllim shitjen e tyre.
NJOFTIMI I POLICISË
Policia Kufitare e Kakavijes kap në kufirin jeshil një shtetas për “Kalim të paligjshëm të kufirit” dhe “Trafikim të veprave të artit dhe kulturës”.
Sekuestrohen në cilësinë e provës materiale sende të ndryshme antike prej metali, argjendi e bronxi. Shërbimet e Policisë Kufitare të Kakavijës, gjatë patrullimit në kufirin jeshil, kanë konstatuar dhe kapur në flagrancë një shtetas i cili po tentonte të hynte në territorin shqiptar nëpërmjet kufirit jeshil me shtetin grek në mënyrë të paligjshme.
Gjatë kontrollit fizik të bërë këtij shtetasi, shërbimet e Policisë Kufitare, kanë konstatuar se në çantën e krahut kishte sende të ndryshme antike prej metali, argjendi e bronxi.
Menjëherë shërbimet e Policisë Kufitare kanë njoftuar Specialistët e Seksionit për Hetimin e Trafiqeve në Drejtorinë Vendore të Policisë Gjirokastër, të cilët në përfundim të veprimeve të para hetimore kanë bërë arrestimin në flagrancë të shtetasit:
Petrit A., 31 vjeç, banues në Tiranë.
Në cilësinë e provës materiale u sekuestrua çanta me sendet e ndryshme antike .
Materialet në ngarkim të këtij shtetasi i kaluan Prokurorisë pranë Gjykatës së Shkallës së Parë Gjirokastër për veprat penale “Kalimi i paligjshëm i kufirit” dhe “Trafikimi i veprave të artit dhe kulturës”, parashikuar nga nenet 297 dhe 138/a të Kodit Penal./a.m.
