Në Ditën Botërore të Veshkave, mjekët nefrologë ngrenë shqetësimin për rritjen e numrit të pacientëve që vuajnë nga dëmtimi i tyre. Sipas mjekes Matilda Imeri, dëmtimi i funksionit të veshkave po vjen në rritje edhe për shkak të stilit të jetesës.
“Ne hospitalizojmë pacientë që nga mosha 15-vjeç. Të rinjtë zakonisht vijnë për shkak të stilit të jetesës. Është rritur numri i të rinjve që konsumojnë lëndë narkotike, dhe mos mbajtja e një peshe ideale, obeziteti tek të rinjtë, ndikojnë negativisht në funksionin e veshkave”, u shpreh Matilda Imeri, mjeke nefrologe.
Mjekët këshillojnë që pacientët nuk duhet të neglizhojnë asnjë çrregullim të urinimit, sepse kjo mund të jetë shenja e parë që veshkat kanë probleme me funksionimin.
“Çrregullimet e urinimit, dobësia trupore, dhimbja e mesit; të gjithë ata që kanë sëmundje si diabeti dhe hipertensioni duhet të jenë të kujdesshëm”.
Mjekja këshillon që personat mbi 40-vjeç të bëjnë kontrolle për funksionimin e veshkave, nëpërmjet analizave të gjakut dhe urinës.
“Në momentin që veshkat dëmtohen, ato janë të parikthyeshme. Nëse nuk kapet dëmtimi në kohë, do të shkohet drejt hemodializës. Moskapja e dëmtimit renal mund të çojë në dializë dhe transplant renal”.
Sëmundjen e veshkave, Organizata Botërore e Shëndetësisë e ka klasifikuar si një epidemi; në botë janë mbi 850 milionë njerëz që vuajnë prej saj.
