Policia e Durrësit ka vënë në pranga katër pesrona, të dyshuar si trafikante heroine.
Sipas policisë, specialistët e seksionit për narkotikët në Drejtorinë Vendore të Policisë Durrës, në bashkëpunim me Prokurorinë e Rrethit Gjyqësor Durrës, si rezultat i një hetimi 3-mujor me metoda speciale, kanë bërë të mundur goditjen e një grupi, të cilët shpërndanin lëndë narkotike të llojit heroinë në zona të ndryshme të qytetit të Durrësit, duke bërë arrestimin në flagrancë të 4 shtetasve: Leonard Vangjeli, 36 vjeç, banues në Durrës; Endrin Hoxha, 30 vjeç, banues në Durrës; Idlir Topçiu, 41 vjeç, banues në Durrës; Adriatik Beli 37 vjeç, banues në Durrës.
Arrestimi i tyre u bë, pasi në kuadër të këtij operacioni, gjatë kontrollit të ushtruar në banesat e tyre iu gjetën dhe sekuestruan në cilësinë e provës materiale rreth 600 gr lëndë narkotike e dyshuar e llojit heroine; një makinë tip Benz me targa AA 557 GE; një thikë profesionale; një peshore elektronike; shtatë aparate celularë.
Shtetasit e arrestuar janë persona me preçedentë penalë të mëparshëm në fushën e veprave penale kundër jetës dhe pronës. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale ”Prodhimi dhe shitja e narkotikëve”.
