Ambasadori i SHBA, Donald Lu i pranishëm sot në Vlorë, në forumin e hapur me studentë të universitetit “Ismail Qemali”, mbi trafikimin e qënieve njerëzore dhe ndalimin e këtij fenomeni. Fenomeni vijon të mbetet ende shqetësues në vendin tonë, ndërsa referuar statistikave të përcjella, vetëm në pesë vitet e fundit janë regjistruar 560 viktima të trafikimit.
24% e viktimave të trafikuara janë kryesisht persona me fëmijë, çka do të thotë se bien pre lehtë e kërcënimeve të ndryshme nga trafikantët. Ambasadori Donald Lu ka kërkuar mbështetje maksimale ndaj personave të trafikuar, ndërsa sipas tij ata janë njerëzit më guximtarë që ai vetë ka njohur.
Vlora, sipas tij, mbetet një komunitet që ka vuajtur nga trafikimi i personave, ndërsa ka kërkuar dënime më të gjata për trafikantët dhe njëkohësisht bashkëpunim më të ngushtë mes policisë dhe prokurorisë.
Vetëm gjatë këtij viti në Vlorë janë evidentuar nga policia rreth 12 raste trafikimi, ndërsa janë shtatë persona të arrestuar. Të dhëna këto të bëra publike nga vetë drejtori i policisë së qarkut Vlorë, Jaeld Cela. Ndërkohë gjatë forumit është kërkuar bashkëpunim më i ngushtë mes institucioneve dhe natyrisht të ftohen edhe studentët që të bëhen pjesë e luftës dhe dënimit të këtij trafiku, ende shqetësues në Vlorë dhe vendin tonë.
