Trafikimi i qenieve njerëzore, i njohur edhe si skllavëria e kohëve moderne është një krim i rëndë, si dhe një shkelje e të drejtave themelore dhe të dinjitetit të njeriut. Fenomeni prek edhe Shqipërinë, ndërsa sfidë për të gjithë aktorët mbetet fuqizimi ekonomik i familjeve më të rrezikuara, që ta ndërtojnë jetën e tyre dhe të fëmijëve në Shqipëri.
Për të sjellë në vëmendjen e publikut dhe të autoriteteve këtë fenomen negativ, dhjetëra të rinj nga e gjithë Shqipëria janë bërë pjesë e një ekspozite me vizatime dhe piktura, përmes të cilave trajtojnë realitetet e ashpra të trafikimit, sfidojnë mendësitë mbizotëruese të cilat janë shpeshherë të gabuara e kontroverse, si dhe bëjnë thirrje për veprim të përbashkët kundër trafikimit të qenieve njerëzore.
Ekspozita është finalizim i konkursit “Histori të Pathëna 3”, organizuar nga World Vision Albania dhe Unicef, me mbështetjen e Ambasadës Britanike në Tiranë.
“Trafikimi i qenieve njerëzore është një histori e përsëritur. Nuk kemi ende arritur të shkëpusim zinxhirët për t’u dhënë liri këtyre viktimave”, u shpreh një nga të rinjtë, punimi i së cilës u vlerësua me çmim nga juria.
Publiku do të ketë mundësi që për 3 ditë të vizitojë fizikisht 30 punimet më të mira, ndër 114 aplikime që janë dorëzuar.
