Trafikantët shqiptarë të marijuanës i kanë kthyer malet Pirenej në ‘vendet e tyre’ kultivimit të lëndës narkotike.
Mediat spanjolle raportojnë se ata shfrytëzojnë zonat e pabanuara për të krijuar fermat e tyre industriale dhe zonat më të spikatura prej tyre janë rajonet si Hoya de Huesca, PallarsJussà (Lleida) ose qarku i vjetër i Ribagorza-s.
Kultivuesit tradicionalë i janë bashkuar mafies shqiptare dhe plantacionet gjigande ruhen nga njerëz të armatosur, të cilët rekrutohen nga ish-ushtarakë të Evropës Lindore.
Trafikantët e zhvendosur në Pirenej, e kanë kthyer kultivimin e marijuanës në një biznes serioz dhe potencialisht më të rrezikshëm.
Pse shqiptarët “pushtuan” Pirenejtë
Në Pirenej u ndërtuan rezervuarë gjigandë nga shteti, e për pasojë banorët u shpronësuan për t’u zhvendosur në qytete. Këto zona malore siguruan kushtet e favorshme për plantacione; ujë, dritë, fara të përshtatura për tokat. Të gjitha këto elementë gjendeshin për përvojën e shqiptarëve në mbjelljen e marijuanës.
“Mos u gaboni, lënda narkotike këtu nuk është diçka e re“, tregon një kultivues i vjetër, i cili më tej shton “helikopterët e policisë kanë qarkulluar me vite. Në fillim, gjatë viteve ’70 ishin disa banorë të zonës, rritën disa bimë, por rezultoi se fara ishte e cilësisë së dobët”
Nëse ata kanë arritur ta bëjnë këtë biznes të funksionojë, kjo është në sajë të gjykimit të tyre, një infrastrukture të sofistikuar dhe një organizate të frymëzuar nga “ushtria” që kishin provuar tashmë shumë më parë në vende si vetë Shqipëria ose Italia e Jugut.
“Pa asnjë lloj dyshimi ka pasur një ndryshim cilësor dhe sasior në llojin e të korrave ”, tregon një efektiv policie që bën pjesë në Sektorin e Narkotikëve. “Gjatë muajve të fundit, ka pasur operacione policore që kanë ndihmuar në zbërthimin e enigmës, në mënyrë që ta kuptojmë se si funksionon, por sfida e madhe mbetet zbërthimi i shpërndarjes së rrjetit për të kuptuar më pas se kush qëndron në krye të organizatës”, tha ai.
“Kuptojmë se paratë që ata mund të marrin nga plantacione si këto janë të pallogaritshme, por ata gjithashtu duhet të investojnë shuma të mëdha. Duhet të marrin me qira automjete, të ndërtojnë infrastrukturë dhe të mbajnë një grusht njerëzish në male për pesë apo gjashtë muaj ”, shpjegon efektivi i policisë.
Një muaj më parë tani, Policia Kombëtare e Huesca, Lleida dhe Barcelona kreu një operacion të ri të përbashkët kundër një grupi shqiptarësh që operonin në një vilë në Lleida.
Ata e përdornin atë si një qendër operacionesh, një ndërtesë në Monzón (Huesca) dhe një zonë e izoluar pranë lumit Noguera Ribagorzana, në kufirin administrativ të Aragonës dhe Katalonjës.
Edhe një herë, modeli u përsërit dhe teoria u konfirmua se mafia lindore kishte zgjedhur mallet Pirenej për të prodhuar marijuanën.
Si rezultat i operacionit katër anëtarë të organizatës u arrestuan dhe 7,870 bimë u sekuestruan – pesë tonë e gjysmë, të papërpunuara dhe 107 rrënjë marijuana.
Vetëm disa ditë më parë, Garda Civile kishte arrestuar një 32-vjeçar shqiptar si dyshohet se ishte përgjegjës për një plantacion me 2,427 bimë marijuane, të vendosura në bregun e djathtë të rezervuarit të Santa Ana, në Os de Balaguer (Lleida).
Teknika që ata kishin përdorur për të fshehur dhe mirëmbajtur rrënjët e kanabisit ishte e njëjta. Ata kishin rimarrë një tokë nga një zonë pyjore, e fshehur midis pemëve dhe shkurreve, dhe e kishin furnizuar me ujë.
g.kosovari
