Avokati i Popullit Igli Totozani firmosi sot në Prishtinë, një marrëveshje bashkëpunimi me homologun e tij Kosovar z. Hilmi Jashari.
Kjo marrëveshje e përbashkët ka për qëllim që të çoj në një nivel më të lartë bashkëpunimin ekzistues ndërmjet palëve, mbështetur edhe në rëndësinë që ka mbrojtja dhe promovimi i të drejtave të njeriut në nivel kombëtar në përputhje me normat dhe standardet ndërkombëtare. Në formulimin e marrëveshjes është vlerësuar roli që kanë institucionet kombëtare për të drejtat e njeriut, veprimtaria e të cilave duhet të mbështetet në parimet e Organizatës së Kombeve të Bashkuara (Parimet e Parisit);
Avokatët e Popullit të Shqipërisë dhe Kosovës angazhohen të intensifikojnë dhe thellojnë më tej bashkëpunimin institucional ndërmjet tyre, në interes të qytetarëve të vendeve përkatëse, me qëllim mbrojtjen efektive të të drejtave dhe lirive të tyre nga veprimet ose mosveprimet e paligjshme të organeve apo të autoriteteve publike. Të dy institucionet do të bashkëpunojnë, për shkëmbimin e eksperincës dhe ofrimin e një shërbimi dhe ndihme të ndërsjelltë, mbështetur në mandatin dhe kuadrin ligjor të brendshëm që rregullon veprimtarinë e tyre.
Në mënyrë të veçantë palët angazhohen në:
-Shkëmbimin e eksperiencës dhe praktikave më të mira sipas fushave të përgjegjësise dhe të drejtave specifike që mbulohen nga legjislacioni i brendshëm i secilës palë;
-Ofrimin e eksperiencës dhe metodologjisë së realizimit të procedurave të inspektimit/monitorimit në vendet e vuajtjes së dënimit, qendrave rezidenciale per të moshuarit, institucionet e shtëpive të fëmijëve, shkollave, spitaleve etj.
-Realizimin e trainimeve/seminareve, konferencave të përbashkëta, me pjesëmarrjen e ekspertëve dhe zyrtarëve të të dyja palëve, sipas fushave dhe nevojave specifike.
-Shkëmbimin e informacionit, për raste të caktuara individuale që lidhen me respektimin dhe mbrojtjen e të drejtave të njerit, duke respektuar me rigorozitet legjislacionin kombëtar që lidhet me mbrojtjen e të dhënave personale;
-Pjesëmarrjen në aktivitete ndërkombëtare, të organizuar në kuadër të organizatave ndërkombëtare, ku palët janë anëtare.
-Funksionimin e vazhdueshëm të një platforme diskutimi dhe këshillimi, për çështje të një interesi të përbashkët.
Avokati i Popullit z. Igli Totozani pas nënshkrimit të kësaj marrëveshje zhvilloi takime të vecanta me Kryetarin e Kuvendit të Kosovës z. Kadri Veseli, si dhe znj. Lirije Kajtazi, Kryetare e Komisionit Parlamentar për të Drejtat e Njeriut.
