Duke marrë shkas dhe nga ngjarjet e kohëve të fundit të shpërthimit të bombolave të gazit qe shkaktuan edhe viktima Inspektoriati Shtetëror Teknik ka intensifikuar kontrollet e tregtimit të gazit. Me anë të një letre ky institucion i është drejtuar, kryetarëve të Bashkive dhe Prefektëve duke i kërkuar ngritjen e grupeve të përbashkëta për kontrollin dhe monitorimin e tregut të bombolave me gaz të lëngshëm.
Kontroll që duhet të shtrihet në evidentimin, parandalimin dhe sanksionimin e kësaj veprimtarie në dyqanet që tregtojnë bombolat me GLN ose bëjnë mbushjen e tyre; dyqanet me artikuj industrial, ushqimor ose miks, ku tregtohen bombola me GLN. Kjo kërkesë ka ardhur pas një sërë ngjarjesh të rënda të ndodhura në vend si pasojë e shpërthimit të bombolave. Objektivi është trajtimi i problematikës që ekziston me dyqanet e shtrira në lagje e blloqe banimi ku gjenden dyqane që magazinojnë dhe tregtojnë bombola me GLN për konsumatorë familjarë. Këto dyqane nuk kanë dokumentacion ligjor për të kryer këtë shërbim. Sipas inspektoriatit shtetëror teknik dhe industrial për tregtimin e bombolave duhet të ketë dokumentacion të veçantë ligjor të lëshuar nga Bashkia për këto subjekte dyqane brenda lagjeve të banimit.
Në funksion të kësaj prefekturat kanë nisur ngritjen e njësive të përbashkëta Task Force që do të veprojnë në terren sipas territoreve respektive të bashkive. Sakaq së shpejti pritet edhe miratimi i vendimit të ri për tregtimin e bombolave të gazit në vendin tonë.
BW
