Reforma në drejtësi ka qënë në qendër të takimit që kreu i Frymës së Re Demokratike, Bamir Topi zhvilloi me anëtarësinë në Sarandë. Ai theksoi se reforma në drejtësi duhej të ishte miratuar, por vetë palët nuk kanë vullnet. Sipas tij kjo klasë politike nuk e do reformën pasi ajo është përgjegjëse për mënyrën si është administruar pushteti në Shqipëri në këto 25 vite dhe duan të shmangin reformat.
“Tek kjo politikë natyrisht nuk kam më asnjë lloj besimi. Në rast se këta bëjnë diçka e bëjnë vetëm në kushtet e presionit të ndërkombëtarëve. Po t’i lenë pa presion sigurisht këta do të nxjerrin një mijë arsye, arsye pa arsye, në mënyrë që ta dominojnë jetën e politikës në një lojë pa rregulla, një lojë që i len ata gjithmonë si faraonë të pushtetit. Kur të merr malli të shohësh politikanë të standardeve evropiane perëndimore të cilët e mbyllin ciklin e tyre dhe ikin. Ndërsa këtu dëshirojnë të rrinë 30 vjet, 40 vjet sa t’i japë zoti Ymër. Sigurisht ky nuk është rregull demokracie”, tha Topi.
Bamir Topi po aq të rëndësishme vlerëson reformën zgjedhore. Sipas tij parlamenti sot ka nivelin më të ulët sa përket standardit moral dhe profesional.
“Një pushtet të pamerituar dhe një pushtet politik patjetër që sjell një pushtet ekonomik informal. Dhe kjo është arsye që mjaft nga njerëzit që sot janë në Parlament janë njerëz me disa emra, me disa gjeneralitete, njerëz që kanë frikë të duan emrin e tyre. Këta nuk e duan emrin e tyre, sepse nuk përfaqësohen dot me të kaluarën e tyre, shpesh herë në mjaft raste një e kaluar kriminale. Fakti që po dalin dita ditës tregon që kjo politikë e ka humbur kredibilitetin e vet në shoqëri dhe unë mendoj që me ndryshimin e ligjit elektoral, me vënien në standarde sikur e ka gjithë Europa, jam i bindur që parlamenti shqiptar do të ketë përfaqësues të tjerë”, nënvizoi ai. Më takimin e Sarandës, kreu i Frymës së re Demokratik nisi një tur takimesh më anëtarësinë në të gjithë vendin, në kuadër të përgatitjeve të strukturave për zgjedhjet e ardhshme.
O TOPE hik dhe ti jep nje shembull fillo nga vetja apo ste leverdis pty?