Bamir Topi tha sot se kriza që ka mbërthyer vendin është pasojë e ndryshimeve kushtetuese të vitit 2008.
Deklaratat e ish-presidentit erdhën pas takimit me Ilir Metën në zyrën e këtij të fundit. Ai u shpreh se zgjidhja nuk vjen nga aktorët jashtë institucioneve, përfshirë edhe ish-presidentët.
“Ne mund të japim një mendim, por jo një zgjidhje. Erdha në Presidencë në respekt të ftesës së Metës. Na kanë cilësuar pas prillit 2008 si honorifikë. Por honor domethënë që të respektosh tjetrin. Mua më rezulton se presidentët pas 2008-ës nuk janë respektuar” – tha Bamir Topi.
Ai apeloi që të gjitha palët duhet të bashkëpunojnë për të gjetur një zgjidhje mbi situatën e krijuar.
Takimi i tij me Presidentin e Republikës ka zgjatur rreth gjysmë ore. Më herët, Meta ka takuar Rexhep Mejdanin, Sali Berishën dhe Bujar Nishanin.
/javanews/a.r
