Tom Holland ka shënuar një tjetër sukses të madh në karrierën e tij, duke u ngjitur në krye të listës së aktorëve, filmat e të cilëve kanë gjeneruar më shumë të ardhura në historinë e kinemasë.
Sipas të dhënave të cituara nga Comicbook.com, filmat ku ka interpretuar aktori britanik kanë arkëtuar në total rreth 15.5 miliardë dollarë në mbarë botën. Me këtë rezultat, Holland ka kaluar Zoe Saldana, me 15.46 miliardë dollarë, dhe Scarlett Johansson, me 15.40 miliardë dollarë.
Një rol të rëndësishëm në këtë rekord ka luajtur suksesi i “Spider-Man: Brand New Day”, i cili ka arkëtuar rreth 2.45 miliardë dollarë globalisht. Filmi është renditur kështu mes prodhimeve më fitimprurëse në historinë e kinemasë, pas “Avatar” dhe “Avengers: Endgame”.
Suksesi në arkë pritet të ndikojë edhe në të ardhurat personale të Holland. Aktori raportohet se është paguar 20 milionë dollarë për rikthimin si Peter Parker, ndërsa marrëveshja e tij përfshin edhe bonuse të lidhura me performancën e filmit. Rritja financiare e aktorit gjatë viteve ka qenë e ndjeshme. Holland e nisi rrugëtimin si Spider-Man në vitin 2016 me “Captain America: Civil War”, ku raportohet se u pagua rreth 250 mijë dollarë. Për “Spider-Man: Homecoming” mori rreth 500 mijë dollarë, ndërsa pagesa e tij u rrit në rreth 4 milionë dollarë për “Far From Home” dhe në 10 milionë dollarë për “No Way Home”.
Ngjitja e tij e shpejtë në Hollywood ka bërë që figura të industrisë ta krahasojnë me Robert Downey Jr., i cili gjithashtu nisi me një pagesë relativisht modeste për “Iron Man”, për t’u shndërruar më pas në një prej aktorëve më të paguar të Marvel.
Me sukseset e fundit, Tom Holland jo vetëm ka forcuar pozicionin e tij si një prej yjeve më të mëdhenj të Hollywood-it, por tashmë kryeson edhe renditjen e aktorëve me filmografinë më fitimprurëse në biletarinë botërore.
