I kthehen 10 mijë euro nga personi që ia kishte borxh, por i bëjnë pritë në rrugë dhe e grabisin persona të maskuar. Një shtetas me inicialet A.D. është grabitur nga persona të armatosur dhe të maskuar në Tiranë vetëm pak çaste pasi ka dalë nga banesa e borxhliut me shumën e parave.
Ngjarja ka ndodhur rreth orës 7.5 të mëngjesit të së mërkurës në rrugën “Ali Baushi” në zonën e “Xhamllikut” në kryeqytet.
Pasi i kanë marrë paratë, grabitësit janë larguar në drejtim të paditur me një automjet tip, Golf. Policia bën me dije se ka identifikuar targat e mjetit dhe po punon për identifikimin dhe ndalimin e autorëve.
Duke vlerësuar dinamikën e ngjarjes, policia dyshon se autorët kanë pasur informacion për kthimin e borxhit nga shtetasi E.T. tek i dëmtuari A.D.
Ata kanë mbikqyrur çdo lëvizje të A.D. dhe pasi e kanë parë të dalë nga banesa e E.T me paratë e kanë kërcënuar dhe i kanë marrë shumën prej 10 mijë euro.
Uniformat blu kanë shoqëruar edhe shtetasin E.T. që i ktheu borxhin personit të dëmtuar.
Njoftimi paraprak i policisë:
Më datë 17.02.2016, rreth orës 07:05, në rrugën “Ali Baushi”, në zonën e njohur si “Xhamlliku”, disa persona me maska kanë goditur me grushte shtetasin A. D dhe i kanë marrë një shumë monetare prej 10.000 (dhjetëmijë) euro.
Dyshohet se autorët janë larguar me mjetin tip “Golf”.
Shtetasi A. D. ndodhej në rrugën “Ali Baushi” në banesën e shtetasit E. T. për të marr shumën prej 10.000 euro, shumë të cilën ja kishte dhënë borxh para disa kohësh.
Pak çaste pasi ka dalë nga banesa e shtetasit E. T., personat e maskuar i kanë marrë shumën monetare.
Pas marrjes së njoftimit policia ka shkuar menjëherë në vendngjarje , janë ngritur pika kontrolli, si dhe është bërë i mundur identifikimi i targës së automjetit që dyshohet se kanë lëvizur autorët.
Shtetasi i dëmtuar A.D është në gjendje të mirë shëndetësore.
Vijon puna për identifikimin dhe kapjen e autorëve.
