Nga Rinald Bregasi
Nëse Gilberto Valdensio Fortunato mbahet mend në Shqipëri, është vetëm për faktin e thjeshtë se është njeriu i fundit që i ka dhuruar fitoren në derbi Tiranës, më 4 maj 2016.
Nga vitet e tij te Partizani, Realdo Fili do të mbahet mend edhe pas shumë kohësh për atë gol të minutës së 95-të, që i mohoi për pak sekonda Tiranës fitoren në derbi.
Derbi është përballja e pasionit, e denjë të prodhojë emocione, histori dhe liderë të rinj brenda një fraksioni sekonde. Cilët mund të jenë heronjtë e rinj të derbit të radhës? Te Partizani, përveç njerëzve si Hoxha, Trashi, Bardhi e Ibrahimi, që i kanë përjetuar emocionet e derbit, nuk mungojnë aspirantët ndër emrat e rinj. Një prej tyre, nisur edhe nga karakteristikat, është Bruno Telushi, njeriu që mund ta zgjidhë ndeshjen në një moment edhe nga një goditje dënimi, siç bëri me Flamurtarin.
Një tjetër kandidaturë është ajo e Mensah, i ri me cilësi teknike, dribling maramendës për kundërshtarët. Nëse do të jetë në fushë, edhe ganezi përbën një kërcënim për bardheblutë.
Derbin mund ta vendosë kushdo, por më tepër premisa bien mbi pjesën sulmuese, Hebaj apo Çinari për shembull. Trashëgimia e shkodranëve në derbi nuk mungon, Xhevahir Sukaj është një ndër fytyrat simbol në kampin e Partizanit në këto vitet e fundit.
Te Tirana, edhe për faktin se vjen nga kategoria inferiore, kandidaturat për të nxjerrë një fytyrë të re të derbit janë më të shumta. Një pjesë e mirë e tyre vijnë nga Afrika, Majkëll Ngoo kryegolashënues në Kategorinë e Parë, me ekpseriencë ndërkombëtare.
Pa dyshim spikat edhe Oduamadi, dikush që ka qenë pjesë e Milanit. Për të mbetur te kolonia afrikane, një kërcënim konstant për mbrojtjen e kuqe do të jetë Winful Kobinah, një tjetër lojtar me këmbë të mira, ndërsa për mentalitet apo eksperiencë mbetet superior Blazhevski, një ndër të paktët lojtarë aktualë të Tiranës që ka fituar titullin në Maqedoni, edhe pse me Vardarin, dhe si një ballkanas di diçka më tepër për atmosferën e një derbi të nxehtë.
Edon Hasani është pa dyshim një tjetër emër që në kampin e Partizanit kanë menduar si t’i ndërtojnë një gardh. Por rrethi i aspirantëve për t’u bërë heronjtë e rinj në derbi nuk ngushtohet vetëm te ta, mund të jetë Imami apo Jasir Asani, Turtulli, Greca Mala, pse jo, edhe një koreanovierior si So Hyon-Uk. Derbi është sfida e pasionit, për të prodhuar gjithmonë heronj e fytyra të reja mes një rivaliteti të pafund.
