Ka nisur në Tiranë sesioni hapës i Kongresit Botëror të Ligjit, një ngjarje ndërkombëtare që pritet të mbledhë vitin e ardhshëm në Shqipëri personalitete të rëndësishme të drejtësisë dhe politikës globale.
Presidenti i Shoqatës Botërore të Ligjit dhe Fondacionit Botëror të Ligjit, Javier Cremades, gjatë fjalës së tij foli për sfidat që po kalojnë demokracitë moderne dhe rrezikun e depërtimit të autokracisë në sistemet demokratike.
Ai deklaroi se bota sot po përballet me një realitet më kompleks duke theksuar se “autokracia po penetron në demokraci”, ndërsa sistemet demokratike po bëhen gjithnjë e më disfunksionale dhe të paqëndrueshme.
“Kemi parë që ka qenë një botë e rrezikshme e ndarë nga një perde e hekurt që nga njëra ishte totalitarizmi dhe ju e dini shumë se në cilën anë të kësaj perde keni qenë ju. Sigurisht që bota ka qenë e rrezikshme por ka qenë e thjeshtë dhe njerëzit donin të arratiseshin dhe të arrini ato hapësira ku prosperiteti ishte i mundur. Sot brezi ynë përballet me një situatë më komplekse, ku duket sikur autokracitë tashmë po bëhen më funksionale dhe demokracitë po bëhen disfunksionale. Autokracia po penetron në demokraci, po bën një destabilizim të demokracisë, po krijon konfuzion dhe po bën të pamundur që sistemi të funksionojë”, u shpreh Cremades.
Ai renditi tre sfida kryesore për shoqëritë moderne, ku veçoi aksesin tek e vërteta në epokën digjitale, presionin ndaj drejtësisë dhe polarizimin politik. Sipas tij, pa të vërtetën nuk mund të ketë liri dhe as sundim të ligjit.
Ai u ndal edhe tek reforma në drejtësi në Shqipëri, duke vlerësuar transformimin që po kalon vendi në kuadër të integrimit europian. Sipas tij, Shqipëria është zgjedhur për të mirëpritur Kongresin edhe për shkak të harmonisë fetare dhe pozitës së saj strategjike në marrëdhëniet ndërkombëtare.
“Ka 3 sfida kryesore, njëra është aksesi tek e vërteta, në fakt është shumë e vështirë që në botën digjitale sot ti detyrojmë qytetarët që të jenë të mirinformuar për realitetin sepse pa të vërtetën nuk mund të krijohet liria, e vërteta dhe nuk mund të krijohet sundimi i ligjit. Shtet po i shohin gjyqtarët sikur janë politikanë të veshur me mantelin e drejtësisë dhe mund të themi që drejtësia është në një rrethim. Ndonjëherë nuk shohim kundërshtarë por shohim vetëm armiq të demokracisë dhe po ndajmë hapësirën publike dhe po përpiqemi që të kuptojmë nacionalitetin për atë që është e mirë në propozimet e kundërshtarit tuaj. Por pse u zgjodh Tirana? Sepse mendojmë që ne mund të mësojmë shumë prej jush. Në këtë vend kaq të vogël keni disa gjëra që janë shumë interesante. Këtu jetojnë besime të ndryshme fetare në harmoni. Për shembull kryeministri juaj është një ndër miqtë më të mirë të presidentit të vendit tim, madje dhe një nga miqtë më të ngushtë të Trump. Pra a mund të mendojmë një vend tjetër që mund të ketë një pozicion kaq të favorshëm. Kemi thënë se KE nuk është thjesht një treg, apo një hapësirë për një qytetari të ndarë por është thjeshtë një hapësirë për sundimin e ligjit. Dhe për këtë arsye transformimi i vendit tuaj dhe i reformës tuaj në drejtësi na bën që ne të vijmë në Shqipëri. Ju do t’ju duhet të transformoni shoqërinë tuaj dhe sistemin tuaj për të futur në BE”, tha ai.
