Këshilli i Ministrave ka miratuar dy vendime të rëndësishme që lidhen me transferimin, menaxhimin dhe zhvillimin e pronave shtetërore përmes Korporatës së Investimeve Shqiptare (KSHI). Vendimet e reja, të propozuara nga Ministri i Ekonomisë dhe Inovacionit, hapin rrugën për ekzekutimin e projektit të investimit për Kompleksin e Ri Governativ te Bulevardi i Ri në Tiranë, si dhe për zgjerimin e portofolit të pronave në kuadër të projektit “Copëzat”.
Vendimet e miratuara prekin drejtpërdrejt një sërë institucionesh publike, të cilat do të duhet të lidhin marrëveshje bashkëpunimi me KSHI-në për akomodimin e tyre dhe zhvillimin e pronave.
Kompleksi Governativ dhe stacioni i ri hekurudhor te Bulevardi i Ri
Nëpërmjet vendimit të dytë, qeveria ka miratuar transferimin në pronësi të KSHI-së të një sipërfaqeje prej 2,431 m² (pjesë e pasurisë nr. 8/738, Zona Kadastrale 8340) te Bulevardi i Ri në Tiranë. Kjo sipërfaqe hiqet nga lista e pasurive në pronësi të Bashkisë së Tiranës dhe i kalon Korporatës për të realizuar projektin “Kompleksi Governativ, Bulevardi i Ri, Tiranë”.
Projekti përfshin ndërtimin e ambienteve të reja funksionale për institucionet publike përfituese; akomodimin e shoqërisë “Hekurudha Shqiptare” sh.a.; zhvillimin e stacionit të ri hekurudhor në kryeqytet.
KSHI autorizohet të veprojë si zhvillues, të prishë objektet ekzistuese në atë parcelë kur është e nevojshme, si dhe të negociojë me subjekte private e publike për zhvillimin e zonës. Shpenzimet e projektimit dhe ndërtimit do të mbulohen nga nënprojektet e investimit “Copëzat” dhe projekte të tjera të Korporatës.
Ndryshimet për projektin “Copëzat” dhe bashkëpunimi me 11 institucione
Vendimi i parë ndryshon dhe plotëson vendimin nr. 328 të vitit 2024, duke shtuar pasuri të reja në shtojcat përkatëse për projektin “Për zhvillimin dhe menaxhimin e pronave shtetërore”.
Akti detyron një sërë institucionesh shtetërore — përfshirë Avokaturën e Shtetit, Agjencinë për Mbështetjen e Shoqërisë Civile, Qendrën e Botimeve për Diasporën, Shërbimin Gjeologjik Shqiptar, Entin Rregullator të Energjisë, Albgaz sh.a., e të tjerë — që brenda 30 ditëve të lidhin marrëveshje bashkëpunimi me KSHI-në. Këto marrëveshje do të përcaktojnë kushtet e dorëzimit të pronave, si dhe sigurimin e ambienteve të përkohshme të punës për institucionet që duhet të lirojnë zyrat gjatë fazës së ndërtimit.
Gjithashtu, KSHI dhe Agjencia e Zhvillimit të Territorit (AZHT) janë autorizuar të ndryshojnë marrëveshjen e tyre ekzistuese, me qëllim që Korporata të mbulojë punimet për përshtatjen e ambienteve të reja të punës për AZHT-në përmes projektit “Copëzat”.
Të dyja vendimet hynë në fuqi menjëherë pas botimit në Fletoren Zyrtare, ndërsa për zbatimin e tyre janë ngarkuar Ministria e Ekonomisë dhe Inovacionit, Ministria e Infrastrukturës dhe Energjisë, Ministria e Financave, Agjencia Shtetërore e Kadastrës dhe vetë KSHI.
Drejt 2030
Bravooo